Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 209 Hüküm no: 201 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın Mutaf İbrahim’e olan borcunun ödenmesi Sadrazam-ı sâbık merhûm İbrahim Paşa kethudâsı müteveffâ Mehmed Paşa b. el-Hâc Mustafa b. Abdurrahman’ın dâyinlerinden râfi‘u’l-kitâb Mûytâb el-Hâc İbrahim b. el-Hâc Receb nâm kimesne meclis-i şer‘-i şerîf-i enverde müteveffâ-yı merkūmun emvâl ve eşyâsı taraf-ı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu îfâya hâlâ Şıkk-ı evvel defterdârı izzetlü Ali Efendi hazretlerinin re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı merkūm Mehmed Paşa b. el-Hâc Mustafa b. Abdurrahman’ın yedimde olan müfredât defteri mantûkunca kendilere bey‘ ve emriyle mahâlline teslîm eylediğim çul ve köstek ve çuval vesâir mûytâb metâ‘ı semenlerinden zimmetlerinde bin yirmi sekiz buçuk guruş hakkım olup hatta müteveffâ-yı merkūm hayatında meblağ-ı mezbûr zimmetlerinde bana deynleri olduğunu alâ-ruûsi’l-işhâd ikrâr ve işhâd edip kable’l-edâ fevt olmağla tereke-i vâfiyesinden taleb ederim deyü suâl olunup edâsıyla tenbîh olunmak murâdımdır dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden olup müteveffâ-yı merkūmun hayatında etbâ‘ından Ahır kethudâsı Mehmed Bey b. el-Hâc İsa ve Sarrâcbaşı Hüseyin Bey b. Mustafa nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında müdde‘î-yi merkūm Mûytâb el-Hâc İbrahim’den iştirâ olunup <> emrimle mahâlline teslîm eylediği çul ve köstek [ve] çuval vesâir mûytâb metâ‘ı semenlerinden mezbûr el-Hâc İbrahim’e zimmetimde bin yirmi sekiz buçuk guruş [50b] vâcibü’l-edâ ve lâzımü’l-kazâ deynimdir deyü bizim huzûrumuzda ikrâr ve bizi işhâd eyledi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde <> bâde’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teberi’ş-şer‘î mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘de li-sene selâse ve erba‘în ve mie ve elf. Şuhûdü’l-hâl: eş-Şâhidûnü’s-sâbıkūn. Temme’l-kelâm fî-hâze’l-makām. Abdurrahman heme kâm-ı dil hâsıl bâd