Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 211 Hüküm no: 203 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın vekîlharc Mustafa Ağa’ya olan borcunun ödenmesi El-emrü hasbemâ hurrire fîhi nemekahü’l-fakīr ileyhi sübhânehû ve te‘âlâ Abdurrahman el-kādî bi-medîneti Kostantıniyyeti’l-mahmiye -ufiye anh.- Sadrazam-ı sâbık merhûm İbrahim Paşa kethudâsı müteveffâ Mehmed Paşa b. el-Hâc Mustafa b. Abdurrahman’ın dâyinlerinden râfi‘u’l-kitâb Vekîlharc Mustafa Ağa b. Abdullah meclis-i şer‘-i şerîf-i enverde müteveffâ-yı merkūmun emvâl ve eşyâsı taraf-ı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu edâya hâlâ Şıkk-ı evvel defterdârı olan izzetlü sa‘âdetlü Ali Efendi hazretleri re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı merkūm Mehmed Paşa b. el-Hâc Mustafa b. Abdurrahman’ın emriyle bi-şarti’r-rücû‘ mâlımdan Emirgûnî oğlu yalısı duvarında ve Anadoluhisarı yalısına ve limonluğuna masrûfum ile meyve ve şükûfe semenlerinden masrûfumdan ba‘de küllî kabz ve hesâb zimmetlerinde iki bin dokuz yüz kırk sekiz guruş hakkım olup hatta hayatında meblağ-ı mezbûr zimmetlerinde bana vâcibü’l-edâ lâzımü’l-kazâ deynimdir deyü alâ-ruûsi’l-işhâd ikrâr ve işhâd dahi edip kable’l-edâ fevt olmağla tereke-i vâfiyesinden taleb ederim suâl olunup edâsıyla tenbîh olunmak murâdımdır dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden olup [51a] müteveffâ-yı merkūmun hayatında etbâ‘ından Seyfullah Ağa b. Abdullah ve Miftâhî Mustafa Ağa b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında vekîlharc Mustafa Ağa’nın emriyle bi-şarti’r-rücû‘ mâlından Emirgûnî oğlu yalısı duvarında ve Anadoluhisarı yalısına ve limonluğuna masrûfu ile emreylediğim mahalle teslîm eylediği mevye ve şükûfe semenlerinden ber-mûceb-i defter-i müfredât masrûfundan ba‘de küllî kabz ve hesâb Vekîlharc Mustafa Ağa’ya zimmetimde iki bin dokuz yüz kırk sekiz guruş vâcibü’l-edâ ve lâzımü’l-kazâ deynimdir deyü bizim huzûrumuzda ikrâr ve bizi işhâd etmişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde bâde’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 11 min-Zilka‘de sene [1]143. Şuhûdü’l-hâl: el-Hâc Abdullah Çelebi b. el-Hâc Hüseyin yorganî, el-Hâc Mustafa b. el-Hâc İbrahim sarrâc, el-Hâc İbrahim b. el-Hâc Receb mûytâb. Mehmed Çelebi b. el-Hâc Mustafa yağlıkcı, Abdülkadir Çelebi b. Abdülkadir yağlıkcı, Abdülbaki Çelebi b. İbrahim balmumcu.