Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 212 Hüküm no: 204 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın Balmumcular Kethudâsı Abdülbaki’ye olan borcunun ödenmesi El-emrü hasbemâ hurrire fîhi nemekahü’l-fakīr ileyhi sübhânehû ve te‘âlâ Abdurrahman el-kādî bi-medîneti Kostantıniyyeti’l-mahmiye -ufiye anh.- Sadrazam-ı sâbık merhûm İbrahim Paşa kethudâsı müteveffâ Mehmed Paşa b. el-Hâc Mustafa b. Abdurrahman’ın dâyinlerinden râfi‘u’l-kitâb Balmumcular Kethudâsı Abdülbaki b. İbrahim meclis-i şer‘-i şerîf-i enverde müteveffâ-yı merkūmun <> emvâl ve eşyâsı taraf-ı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu îfâya hâlâ Şıkk-ı evvel defterdârı izzetlü sa‘âdetlü Ali Efendi hazretlerinin re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı merkūm Mehmed Paşa b. el-Hâc Mustafa b. Abdurrahman’ın emirleriyle taraflarından yedimden iştirâ ve kabz olunan iki yüz on beş vakıyye balmumu semenlerinden iki yüz on beş guruş zimmetlerinde hakkım olup hatta hayatında meblağ-ı mezbûr zimmetinde bana edâsı lâzım deyni olduğunu alâ-ruûsi’l-işhâd ikrâr ve işhâd edip kable’l-edâ fevt olmağla meblağ-ı mezbûru tereke-i vâfiyesinden taleb ederim suâl olunsun dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden olup müteveffâ-yı merkūmun hayatında etbâ‘ından Vekîlharc el-Hâc Mustafa Ağa b. Abdullah ve Bâzâragiden İbrahim Bey b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında Balmumcular Kethudâsı Abdülbaki’den tarafımdan iştirâ olunan iki yüz on beş vakıyye balmumu semeninden mezbûr Abdülbaki’ye zimmetimde iki yüz on beş guruş vâcibü’l-edâ ve lâzımü’l-kazâ deynimdir deyü bizim huzûrumuzda ikrâr ve bizi işhâd eyledi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde bâde’t-ta‘dîl ve’t-tezkiye şehâdetleri makbûle olmağın ba‘de’t-tahlîfi’ş-şer‘î mûcebiyle ba‘de’l-hükm ve’t-tenbîh mâ-hüve’l-vâki‘ bi’t-taleb ketb olundu. Fî 11 min-Zilka‘de sene [1]143. Şuhûdü’l-hâl: Mehmed Ağa b. Mehmed kethudâ, Salih Çelebi b. Süleyman, Mehmed Çelebi b. el-Hâc Mustafa yağlıkcı, Abdülkadir Çelebi b. Abdülkadir yağlıkcı, Mehmed Bey b. Mehmed na‘lbend, el-Hâc Mustafa b. İbrahim sarrâc, el-Hâc Abdullah b. el-Hâc Hüseyin yorganî, Ömer Ağa b. Halil haffâf.