Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 213 Hüküm no: 205 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın Sandıkcı Hasan Çelebi’ye olan borcunun ödenmesi El-emrü hasbemâ hurrire fîhi nemekahü’l-fakīr ileyhi sübhânehû ve te‘âlâ Abdurrahman el-kādî bi-medîneti Kostantıniyyeti’l-mahmiye -ufiye anh.- Sadrazam-ı sâbık merhûm İbrahim Paşa kethudâsı müteveffâ Mehmed Paşa b. el-Hâc Mustafa b. Abdurrahman’ın dâyinlerinden Sandıkcı Hasan Çelebi b. Yusuf nâm kimesne meclis-i şer‘-i şerîf-i enverde müteveffâ-yı merkūmun emvâl ve eşyâsı taraf-ı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu îfâya hâlâ Şıkk-ı evvel defterdârı izzetlü sa‘âdetlü Ali Efendi hazretlerinin re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı merkūmun hayatında emriyle taraflarından yedimden iştirâ ve kabz eyledikleri kösele muşamma‘lı cedîd astarlı gırâr sepeti ve sandık ve kumaş sepeti vesâir sandıkcı metâ‘ı semenlerinden ber-mûceb-i defter-i müfredât zimmetlerinde altı yüz doksan altı buçuk guruş hakkım olup hatta müteveffâ-yı merkūm hayatında meblağ-ı mezbûr cihet-i merkūmeden zimmetlerinde bana edâsı lâzım deyni olduğunu [51b] alâ-ruûsi’l-işhâd ikrâr ve işhâd edip kable’l-edâ fevt olmağla tereke-i vâfiyesinden taleb ederim suâl olunup edâsıyla tenbîh olunmak murâdımdır dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden olup müteveffâ-yı merkūmun hayatında etbâ‘ından Miftâhî Mustafa Ağa b. Abdullah ve el-Hâc Abdullah b. el-Hâc Hüseyin nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında Sandıkcı Çelebi’den emrimle tarafımdan iştirâ ve kabz olunan kösele muşamma‘lı cedîd astarlı gırâr sepeti ve sandık ve mefraş ve kumaş sepeti vesâir sandıkcı metâ‘ı semenlerinden merkūm Sandıkcı Hasan Çelebi’ye altı yüz doksan altı buçuk guruş zimmetimde vâcibü’l-edâ ve lâzımü’l-kazâ deynimdir deyü bizim huzûrumuzda ikrâr ve husûs-ı mezbûra bizi işhâd etmişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde bâde’t-ta‘dîl ve’t-tezkiye şehâdetleri makbûle olmağın ba‘de’t-tahlîfi’l-mu‘teberi’ş-şer‘î mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 11 min-Zilka‘de sene [1]143. Şuhûdü’l-hâl: Ömer Çelebi b. Halil haffâf, el-Hâc Mustafa b. İbrahim sarrâc, el-Hâc İbrahim b. Receb mûytâb, Sandıkcı Hasan Çelebi b. Yusuf, el-Hâc Mustafa b. Abdullah vekîlharc, İbrahim Bey b. Abdullah bâzâragiden, Balmumcu Abdülbaki b. İbrahim.