Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 289 Hüküm no: 413 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evlerinde bulunan bütün eşyanın kocası Rıdvan’a ait olduğuna dair Letafet bt. Abdullah’ın ikrarı Mahmiye-i İstanbul’da el-Hâc Teberrük Mahallesi sâkinelerinden Letafet bt. Abdullah nâm hatun tarafından ikrâr-ı âti’z-zikre vekîl olup mezbûreyi ma‘rifet-i şer‘iyye ile ârifân olan İbrahim Beşe b. Ebîbekir ve Halil Beşe b. Abdullah şehâdetleriyle vekâleti sâbite olan Ali b. Kasım nâm kimesne mahfil-i şer‘-i şerîfde mezbûre Letafet Hatun’un zevci olan işbu sâhibü’l-kitâb Rıdvan b. Abdülvehhab mahzarında bi’l-vekâle ikrâr-ı tâm ve bast-ı merâm kılıp müvekkile-i mezbûre Letafet zevcim mezbûr Rıdvan ile sâkine olduğum menzil dâhilinde olan evânî-i büyût ve nuhâs vesâir esâs ve eşyâda kat‘an benim medhal ve alâkam olmayıp cümle zevcim mezkûrun mülküdür, ancak üzerimde olan eşyâdan ve zevcim mezbûr Rıdvan zimmetinde olan iki bin akçe mehr-i müeccelimden mâ‘adâ ism-i mâl ıtlâk olunur bir şeyim yokdur deyü ikrâr u i‘tirâf eyledi dedikde gıbbe’t-tasdîk ve’t-taleb mâ-vaka‘a sebt ü ketb olundu. Fi’s-sânî ve’l-ışrîn min-Şa‘ban li-seneti’l-mezbûre. Şuhûdü’l-hâl: Musa Çavuş b. Abdullah, Nuh Çelebi b. Şeyhi Çelebi, Sarrac Mehmed Çelebi b. Abdullah, Ömer Bey b. Abdullah, Halil Efendi b. Mehmed el-imâm, Hızır Bey b. Abdullah ve gayruhum mine’l-huzzâr.