Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 288 Hüküm no: 412 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ziyade bt. Mosi ve kocası Yako v. Yako’nun evlerini el-Hâc Halil Bey’e sattıkları Mahmiye-i İstanbul’da Kerdüz cemâ‘atinden Yako v. Yako nâm Yahûdi asâleten ve zevcesi Ziyade bt. Mosi tarafından husûs-ı âti’l-beyâna vekîl olup vekâleti hasm-ı câhid-i şer‘î el-Hâc İshak b. Mehmed ve el-Hâc Said b. Yahya şehâdetleri ile sâbite olmağın vekâleten meclis-i şer‘-i hatîr-i lâzımü’t-tevkīrde işbu râfi‘u’l-kitâb el-Hâc Halil Bey b. Mustafa mahzarında ikrâr u i‘tirâf edip Mahrûse-i Üsküdar’da âsûde olan kutbü’l-ârifîn eş-Şeyh Mahmud Efendi’nin -kuddise sırruhü’l-azîz- evkāfından icâre-i mu‘accele ve yevmî on beş akçe ücret-i müeccele ile ale’l-iştirâki’s-seviyy müvekkilem mezbûre ile mutasarrıf olduğum mahmiye-i merkūmede Balıkpazarı nâm mevzi‘de vâki‘ bir tarafı Bostancıbaşı Vakfı ve bir tarafı mîrî Tüfenkhâne ve [bir] tarafı sâhil-i bahr ve bir tarafı tarîk-i âm ile mahdûd olup fevkānî ve tahtânî büyût-ı müte‘addideyi ve mahzeni ve selhhâneyi müştemil olan menzilin hakk-ı tasarrufunu vakf-ı mezbûrun mütevelliyesi ma‘rifetiyle iki yük elli beş bin bedel mukābelesinde asâleten ve vekâleten tefvîz edip ol dahi tefevvüz ve kabûl eyledikden sonra bedel-i tefvîz olan meblağ-ı merkūm iki yük elli beş bin akçenin kırk beş bin akçesini nakd ve iki yük on bin akçesinden dahi her bir miskālini üçer buçuk kıt‘a riyâlî guruşa olmak üzere yedi yüz on iki miskāl portukal inci mezbûr el-Hâc Bey yedinden asâleten ve vekâleten ahz u kabz eyledim, ba‘de’l-yevm menzil-i mezbûrda benim müvekkilemin alâka ve medhalimiz kalmayıp mezbûr el-Hâc Halil Bey’in dâhil-i taht-ı tasarrufu olmuşdur dedikde gıbbe’t-tasdîkı’l-mu‘teber mâ-vaka‘a bi’t-taleb ketb ü sebt olundu. Fi’l-yevmi’l-mükemmil? li’l-ışrîn min-Şa‘bani’l-mu‘azzam li-sene erba‘a ve sittin ve elf. Şuhûdü’l-hâl: Balcı Solak Osman Çelebi, el-Hâc Abdullah b. Abdurrahman, el-HâcRamazan b. Mehmed, İbrahim Çelebi b. Davud ve gayruhum mine’l-huzzâr.