Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 215 Hüküm no: 207 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın kazzâz Abraham’a olan borcunun ödenmesi El-emrü hasbemâ hurrire fîhi nemekahü’l-fakīr ileyhi sübhânehû ve te‘âlâ Abdurrahman el-kādî bi-medîneti Kostantıniyyeti’l-mahmiye -ufiye anh.- Sadrazam-ı sâbık merhûm İbrahim Paşa kethudâsı Mehmed Paşa b. el-Hâc Mustafa b. Abdurrahman’ın dâyinlerinden râfi‘u’s-sifr Gazzaz Abraham v. Yasef nâm Yahûdî meclis-i şer‘-i şerîf-i enverde müteveffâ-yı merkūmun emvâl ve eşyâsı taraf-ı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu îfâya hâlâ Şıkk-ı evvel defterdârı izzetlü sa‘âdetlü Ali Efendi hazretlerinin re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı merkūm Mehmed Paşa b. el-Hâc Mustafa b. Abdurrahman’ın emriyle ber-mûceb-i defter-i müfredât taraflarından yedinden iştirâ ve kabz olunan Gazzaz metâ‘ı semeninden zimmetlerinde dört bin dört yüz elli bir guruş hakkım olup hatta müteveffâ-yı merkūm hayatında meblağ-ı mezkûr zimmetlerinde bana edâsı lâzım deyni olduğunu alâ-ruûsi’l-işhâd ikrâr ve işhâd edip kable’l-ed[â] fevt olmağla tereke-i vâfiyesinden taleb ederim suâl olunup edâsıyla tenbîh olunmak murâdımdır dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden olup müteveffâ-yı merkūmun hayatında etbâ‘ından Seyfullah Ağa b. Abdullah ve Miftâhî Mustafa Ağa b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında Gazzaz Abraham Yahûdî’ye zimmetimde dört bin dört yüz elli bir guruş vâcibü’l-edâ ve lâzımü’l-kazâ deynimdir deyü bizim huzûrumuzda ikrâr bizi işhâd etmişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde bâde’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teberi’ş-şer‘î mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 11 Zilka‘de sene [1]143. Şuhûdü’l-hâl: Ömer Çelebi b. Halil haffâf, el-Hâc Mustafa b. İbrahim mûytâb, el-Hâc Mustafa b. İbrahim, Sandıkcı Hasan Çelebi b. Yusuf, el-Hâc Mustafa b. Abdullah vekîlharc, İbrahim Bey b. Abdullah bâzârkilâr [bâzâragiden], Balmumcu Abdülbaki b. İbrahim.