Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 216 Hüküm no: 208 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın Şeritci Yuda’ya olan borcunun ödenmesi El-emrü hasbemâ hurrire fîhi nemekahü’l-fakīr ileyhi sübhânehû ve te‘âlâ Abdurrahman el-kādî bi-medîneti Kostantıniyyeti’l-mahmiye -ufiye anh.- Sadrazam-ı sâbık merhûm İbrahim Paşa kethudâsı müteveffâ Mehmed Paşa b. el-Hâc Mustafa b. Abdurrahman’ın dâyinlerinden râfi‘u’s-sifr Şeritci Yuda v. İsak nâm Yahûdî meclis-i şer‘-i şerîf-i enverde müteveffâ-yı merkūmun emvâl ve eşyâsı taraf-ı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu îfâya hâlâ Şıkk-ı evvel defterdârı izzetlü sa‘âdetlü Ali Efendi hazretlerinin re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı merkūm Mehmed Paşa b. el-Hâc Mustafa b. Abdurrahman’ın emriyle taraflarından ber-mûceb-i defter-i müfredât yedinden iştirâ ve kabz olunan şerit ve saçak vesâir emti‘a semenlerinden zimmetlerinde bana edâsı lâzım iki bin sekiz yüz dokuz guruş hakkım olup hatta müteveffâ-yı merkūm hayatında meblağ-ı mezbûr cihet-i merkūmeden ber-vech-i muharrer deyni olduğunu alâ-ruûsi’l-işhâd ikrâr ve işhâd edip kable’l-edâ fevt olmağla tereke-i vâfiyesinden taleb ederim suâl olunup edâsıyla tenbîh olunmak murâdımdır dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden olup müteveffâ-yı merkūmun hayatında etbâ‘ından Seyfullah Ağa b. Abdullah ve Miftâhî Mustafa Ağa b. Abdullah ve Osman Efendi b. Mustafa nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında Şeritci Yuda Yahûdî’den tarafından ber-mûceb-i defter-i müfredât emrimle iştirâ olunan kılabdan şerit ve saçak vesâir emti‘a bahâsından merkūm Yuda Yahûdî’ye zimmetimde iki bin sekiz yüz dokuz guruş vâcibü’l-edâ ve lâzımü’l-kazâ deynimdir deyü bizim huzûrumuzda ikrâr ve bizi işhâd eylemiş idi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde bâde’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teberi’ş-şer‘î mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 11 Zilka‘de sene [1]143. Şuhûdü’l-hâl: eş-Şâhidûnü’s-sâbıkūn.