Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 219 Hüküm no: 211 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Enserci Haçador’un Kâtipkasım mahallesinde bulunan ev hissesini karısına ve kızına sattığı Mübâya‘a-i kefere. Mahmiye-i İstanbul’da Kâtib Kasım mahallesi sükkânından enserci Haçador v. Mardiros v. Haçuk nâm Ermeni tarafından husûs-ı âti’z-zikri ikrâra vekîl olduğu mahalle-i mezbûre imâmı Mustafa Efendi b. Nasuh ve Mustafa Çelebi b. Mehmed şehâdetleriyle şer‘an sâbit olan Sıvacı Hürmüz v. Aleksan nâm Ermeni meclis-i şer‘-i şerîf-i enverde zevce-i menkûhası Maryem bt. Asvador ile sulbiye kızı bâ‘isetü hâzihi’l-vesîka Prabiyon nâm Ermeniler muvâcehelerinde bi’l-vekâle ikrâr ve takrîr-i kelâm edip müvekkil-i mezbûr enserci Haçador akd-i âti’z-zikrin sudûruna değin yedinde mülk ve hakkı olup mahalle-i mezbûrede vâki‘ bir tarafdan Sarrâf Artin nâm Ermeni mülkü ve bir tarafdan Sofcu Kirkor Ermeni mülkü ve bir tarafdan Aleksan nâm zimmî mülkü ve bir tarafdan tarîk-ı âm ile mahdûd ulyâda iki bâb oda ve bir matbah ve sofa ve kenîf ve vustâda yine iki bâb oda ve bir matbah ve sofa ve süflâda bir oda ve matbah ve bodrum ve bi’r-i mâ ve kenîf ve havluyu muhtevî mülk menzilin rub‘ şâyi‘i bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile yüz guruş semen-i makbûza zevcesi mezbûre Maryem’e ve selâse-i erbâ‘ını üç yüz guruşa kızı mezbûre Prabiyon’a bey‘ ve temlîk ve semen-i mezbûr üç yüz guruşu mezbûre Prabiyon’a mukaddemâ cihet-i karzdan zimmetinde deyni olan üç yüz guruş deynine takās ve mahsûb eylediğinden mezbûre Prabiyon dahi ber-minvâl-i muharrer iştirâ ve temellük ve mukāssa ve kabûl eyledi. Fîmâ-ba‘d menzil-i mahdûd-ı mezkûrun rub‘u mezbûre Maryem’in ve selâse-i erbâ‘ı kızı mezbûre Prabiyon’un mülk-i müşterâları olup müvekkil-i mezbûrun kat‘a alâka ve medhali kalmadı. Her biri keyfe mâ teşâ mutasarrıf olsunlar dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 19 min-Zilhicceti’ş-şerîfe sene [1]143. Şuhûdü’l-hâl: Mustafa Efendi b. Nasuh el-imâm, Molla Mehmed b. İbrahim el-müezzin, es-Seyyid Mehmed b. Mehmed, Mustafa Çelebi b. Mehmed, Hasan Beşe b. Ali, Ali Beşe b. Mehmed, Molla Hasan b. Mustafa, Mustafa Çelebi b. Abdullah, Mehmed Çelebi b. Abdullah, Todori v. Erik, Agba v. Manuk, Avanos v. Artin.