Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 226 Hüküm no: 219 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Ali’in karısına gönderdiği eşyayı teslim etmediği iddiasıyla kaynına açtığı davada haksız olduğu Medîne-i Üsküdar’da Kefçe mahallesinde sâkin el-Hâc İbrahim b. Ali nâm kimesne meclis-i şer‘-i şerîf-i enverde kayını işbu bâ‘isü’l-kitâb Mehmed Beşe b. İsmail mahzarında üzerine da‘vâ ve takrîr-i kelâm edip eşyâ-i memlûkemden kırk guruş kıymetli bir çuka biniş ve altmış guruş kıymetli bogāsıye kaplı bir susamuru kürk ve kırk guruş kıymetli bir sîm gaddâre ve on iki guruş kıymetli bir çuka yağmurluk ve bir buçuk guruş kıymetli bir sîm fincan zarfı ve dört guruş kıymetli bir Çerkez bıçağı ile nakd yüz guruşumu bin yüz kırk bir senesinde diyâr-ı Acem’de medîne-i Üsküdar’[da] sâkine zevcim ( ) nâm hatuna îsâl ve teslîm etmek üzere kayınım mezbûr Mehmed Beşe’ye bi-tarîkı’l-emâne def‘ ve teslîm ol dahi ber-vech-i muharrer yedimden ahz u kabz eylediğinden sonra zikrolunan eşyâ ve nukūdu zevcem mezbûreye teslîm etmemekle mezbûr Mehmed Beşe’ye suâl olunup eşyâ-i muharrere-i mezbûre mevcûd ise a‘yânın müstehleke ise ba‘de’s-sübût kıymet-i şer‘iyeleriyle meblağ-ı mezbûr yüz guruş bi-tarîkı’d-damân bana edâ ve teslîme tenbîh olunması matlûbumdur dedikde gıbbe’s-suâl mezbûr Mehmed Beşe cevâbında müdde‘î-yi mezbûr târih-i mezbûrda husûs-ı mezkûru bir def‘a dahi benden taleb ve da‘vâ ve ba‘de’n-nizâ‘ huzûr-ı Müslimînde eşyâ-i muharrereye müte‘allika âmme-i da‘vâdan zimmetimi ibrâ ve ıskāt eylemişidi deyü def‘le mukābele edicek gıbbe’l-istintâk ve’l-inkâr mezbûr Mehmed Beşe’den def‘-i mezkûruna mutâbık beyyine taleb olundukda udûl-i ahrâr-ı ricâl-i Müslimînden olup medîne-i mezbûreden Aşçıbaşı mahallesi sâkinlerinden İmâm Ahmed Efendi b. Ali ve el-Hâc Mehmed b. Abdullah ve Mehmed b. Mehmed nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka müdde‘î-yi mezbûr el-Hâc İbrahim bin yüz kırk bir senesi târihinde eşyâ-i muharrere-i mezkûre ile meblağ-ı mezbûru mezbûr Mehmed Beşe’den taleb ve da‘vâ sadedinde olup ol dahi ba‘de’l-inkâr vesâtet-i muslihûn ile müdde‘î-yi mezbûr el-Hâc İbrahim da‘vâ-yı mezkûresinden bizim huzûrumuzda fâriğ ve husûs-ı mezkûra müte‘allika âmme-i da‘vâdan kayını işbu mezbûr Mehmed Beşe’nin zimmetini ibrâ ve ıskāt eyledi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-yi mezbûr bî-vech mu‘ârazadan men‘ birle mâ-vaka‘a bi’t-taleb ketb olundu. Fî 29 min-Zilhicce sene [1]143. Şuhûdü’l-hâl: Seyyid el-Hâc Mehmed Efendi b. el-Hâc Veli, Mustafa Çelebi b. Emîn Mehmed, Ali Beşe b. el-Hâc Mehmed, Hüseyin Efendi b. el-Hâc Mehmed kâtib, Mehmed Çelebi b. Abdullah.