Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 225 Hüküm no: 218 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızıltaş mahallesinden Emine Hatun’un bahçeli evini sattığı Mahmiye-i İstanbul’da Kızıltaş mahallesinde sâkine olup zâtı es-Seyyid Mehmed Çelebi b. es-Seyyid Halil ve Ali Ağa b. Mehmed ta‘rîfleriyle mu‘arrefe olan Emine bt. Abdullah nâm hatun meclis-i şer‘-i şerîf-i enverde bâ‘isü hâze’l-kitâb es-Seyyid Mehmed Ağa b. el-Hâc Süleyman Ağa b. Mustafa’nın babası ve tarafından husûs-ı âti’z-zikri tasdîka vekîl olduğu nehc-i şer‘î ve tarîk-ı mer‘î üzere sâbit olan mezbûr el-Hâc Süleyman Ağa mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan el-Hâc Ömer Ağa mülkü ve bir tarafdan Mirâhur odaları ve bir tarafdan Ali Ağa mülkü ve bir tarafdan tarîk-ı âm ile mahdûd dâhiliyesinde ulyâda iki bâb oda ve bir sofa ve bir kilâr vustâda bir oda ve sofa ve kilâr ve kenîf ve süflâda bir matbah ve hamam ve bi’r-i mâ ve kenîf ve zîr-zemîn ve bahçe ve havlu ve hâriciyesinde bi’r-i mâ ve havluyu muhtevî mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî ve şürût-ı müfsideden ârî bey‘-ı bâtt-ı sahîh-i şer‘î ile bin iki yüz guruşa müvekkil-i mezbûr için vekîl-i mezbûr el-Hâc Süleyman Ağa’ya bey‘ ve temlîk ve teslîm eylediğimde ol dahi ber-vech-i muharrer bi’l-vekâle iştirâ ve temellük ve tesellüm edip semeni olan meblağ-ı mezbûr bin iki yüz [55a] guruşu müvekkil-i mezbûr mâlından olmak üzere vekîl-i mezbûr el-Hâc Süleyman Ağa yedinden tamamen ahz u kabz eyledim min-ba‘d menzil-i mahdûd-ı mezkûr müvekkil-i mezbûr es-Seyyid Mehmed Ağa’nın mülk-i müşterâsı olup kat‘a benim alâka ve medhalim kalmadı. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 5 min-Muharremi’l-harâm sene [1]144. Şuhûdü’l-hâl: el-Hâc Ahmed Efendi b. el-Hâc Mehmed el-imâm, el-Hâc Salih b. el-Hâc Mehmed, el-Hâc Hasan b. Mehmed, el-Hâc İsmail b. el-Hâc Mehmed, el-Hâc Abdullah b. Abdullah, Ali Çelebi b. Abdullah, İbrahim Çelebi b. el-Hâc Mehmed, İbrahim Çelebi b. Ali, Hasan Çelebi b. Murtaza, es-Seyyid İsmail Beşe b. Abdullah, el-Hâc Hüseyin b. Ahmed, el-Hâc Hasan b. Abdullah.