Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 228 Hüküm no: 222 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un Galata’nın Sultanbayezid mahallesindeki ev hissesini Cafer Ağa’ya sattığı Mübâya‘a rub‘ hisse. Mahmiye-i İstanbul’da ( ) mahallesinde sâkine Fâtıma bt. Ebûbekir b. Abdullah tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iye ile ârifân Ahmed Çelebi b. Ömer ve Mehmed b. Mahmud şehâdetleriyle sâbit olan zevci Osman b. Mustafa nâm kimesne meclis-i şer‘-i şerîf-i enverde işbu hâfızü’l-kitâb Cafer Ağa b. Ahmed mahzarında bi’l-vekâle ikrâr-ı tâm ve takrîr-i kelâm edip akd-i âti’z-zikrin sudûruna değin rub‘u müvekkilem mezbûrenin ve rub‘-ı âharı müşteri-yi mezbûr Cafer Ağa’nın ve nısf-ı âharı Zeyneb Hatun’un silk-i mülkünde münselik olup mahrûse-i Galata mahallâtından Sultan Bâyezid mahallesinde vâki‘ bir tarafdan Praşkova menzili ve bir tarafdan Zeyneb nâm hatun menzili ve bir tarafdan Varilci Yani menzili ve bir tarafdan tarîk-ı âm ile mahdûd taş duvar ve bi’r-i mâ ve yetmiş beş zirâ‘ arsa üzerinde mebnî fevkānî bir bâb oda ve tahtânî bir bâb odayı müştemil menzilde olan rub‘ hisse-i irsiyesini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr Cafer Ağa’ya yetmiş guruşa bi’l-vekâle bey‘ ve temlîk ve teslîm eylediğimde ol dahi iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yetmiş altı [56a] guruşu yedinden tamamen ahz u kabz eyledim. Ba‘de’l-yevm hisse-i mezbûre mezbûr Cafer Ağa’nın ber-vech-i muharrer mülk-i müşterâsı olup müvekkilem mezbûrenin kat‘a alâka ve medhali kalmamışdır. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Muharremi’l-harâm sene [1]144. Şuhûdü’l-hâl: Sultan kethudâsı Ömer Ağa b. Ali, Kimyâcı Ahmed Ağa, Hüseyin Efendi dâmad-ı Mustafa Ağa, İbrahim Çelebi b. Mustafa, Mehmed Çelebi b. Abdullah.