Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 229 Hüküm no: 223 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce Hatun’un küçük kızı için, boşandığı Çukadar Boşnak Abdullah’dan nafaka talebi Mahmiye-i İstanbul’da Kınalıdede mahallesi sâkinelerinden Hadîce bt. İbrahim Ağa b. Derviş nâm hatunun babası ve tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iye ile ârifân Ahmed Çelebi b. Mehmed ve Abdurrahman b. Hüseyin şehâdetleriyle sâbit olan merkūm İbrahim Ağa meclis-i şer‘-i şerîf-i enverde takrîr-i kelâm ve bast-ı merâm edip kızım müvekkile-i mezbûrenin zevc-i sâbıkı gāib ani’l-beled Çukadâr Boşnak Abdullah b. Yusuf nâm kimesnenin firâşından hâsıla ve müvekkile-i mezbûreden mütevellide ve bi-hakkı’l-hıdâne hacr ve terbiyesinde olan sulbiye kebîre [sagīre] kızı Ümmügülsüm’ün mâlı olmamağla nafaka ve kisveye muhtâc olmağın babası gāib-i mezbûr Abdullah üzerine kıbel-i şer‘den kadr-ı kifâye nafaka ve kisve-bahâ farz ve takdîr olunmak bi’l-vekâle matlûbumdur dedikde hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi sagīre-i mezbûrenin nafaka ve kisve-bahâsıʼçün babası gāib-i mezbûr üzerine târih-i kitâbdan yevmî onar akçe farz ve takdîr edip meblağ-ı mefrûz-ı mezbûru ber-vech-i muharrer harc ve sarfa ve lede’l-iktizâ istidâneye ve vakt-i zaferde babası gāib-i mezbûr üzerine rücû‘a müvekkile-i mezbûre Hadîce Hatun’a izin verilmeğin mâ-vaka‘a bi’t-taleb ketb olundu. Fî 10 Muharrem sene [1]144. Şuhûdü’l-hâl: Ahmed Beşe b. Mehmed, Mustafa Beşe b. Hüseyin, İsmail Beşe b. Mustafa, Mehmed Çelebi b. Abdullah tahtacı.