Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 229 Hüküm no: 224 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadar İbrahim Ağa tarafından Nalband Abdülbaki Ağa’ya havale edilen Kettânî Ahmed’in alacağı olan demir parası davası Ma‘rûz. Muhzır Ahmed mübâşeretiyle Bâb Mahkemesi’ne ihzâr olunan Na‘lband tâifesinden Abdülbaki Ağa mahzarında Kettânî el-Hâc Ahmed meclis-i şer‘de gāib ani’l-meclis Çukadâr İbrahim Ağa yedinden müşterâ ve makbûz yüz doksan beş kantar kırk dört lodra demir bahâsından yüz iki bin sekiz yüz elli akçe zimmetinde hakkı olmağla üçümüz bir meclisde olduğumuz hâlde meblağ-ı mezbûr ile beni Abdülbaki Ağa üzerine havâle-i sahîha ile havâle eylediğinde her birimiz havâle-i merkūmeyi kabûl eylediğimizden sonra meblağ-ı mezbûru merkūm Abdülbaki Ağa’dan taleb ve da‘vâ ve ahz u kabz ve bana îsâle tarafımdan vekîl olan Mustafa b. Abdurrahman’a edâ ve teslîm etmemekle taleb ederim deyü da‘vâ eyledikde mezbûr Abdülbaki Ağa cevâbında semen-i mezbûrun doksan bin akçesini bi’d-defa‘ât şuhûd mahzarında bundan akdem vekîl-i mezbûr Mustafa’ya edâ ve teslîm ol dahi yedimden ahz u kabz edip semen-i mezbûrdan müdde‘î-yi mezbûrun ancak on iki bin sekiz yüz elli akçe hakkı bâkī kalmışdır deyü def‘ ve def‘-i mezkûrunu tâife-i mezkûre kethudâsı el-Hâc Abdurrahman Ağa vesâir adâletleri zâhir olan tâife-i mezbûreden el-Hâc Süleyman Ağa b. el-Hâc İbrahim ve el-Hâc Mehmed Ağa b. el-Hâc Mehmed ve İbrahim Ağa b. Halil nâm kimesneler ile vech-i şer‘î üzere isbât etmeğin mûcebince müdde‘î-yi mezbûr meblağ-ı merkūm doksan bin akçe da‘vâsıyla ba‘de’l-men‘ meblağ-ı bâkī mezbûr on iki bin sekiz yüz elli akçeyi ikrârı mûcebince müdde‘î-yi mezbûra edâ ve teslîme mezbûr Abdülbaki Ağa’ya tenbîh olunduğu huzûr-ı âlîlerine i‘lâm olundu. Fî-gurreti Zilka‘de sene [1]143.