Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 290 Hüküm no: 415 Orijinal metin no: [60b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi’nin annelerinden kalan çiftlik, mezraa ve çayırlardaki hissesini kız kardeşi Fâtıma’ya sattığı Vilâyet-i Anadolu’da medîne-i Ankara Mahallesi’nden Küçük Ahmed Paşa Mahallesi’nde sâkin olan Abdullah Çelebi b. Muhib Efendi meclis-i şer‘-i şerîfde mahmiye-i İstanbul’da el-Hâc Bayram Mahallesi’nde sâkine olan li-üm kız karındaşı fahrü’l-muhadderât Fâtıma bt. Ebîbekir nâm hatun tarafından ikrâr-ı âti’l-beyânı tasdîka vekîl-i sâbitü’l-vekâlesi olan zevci işbu bâ‘isü’l-kitâb Hızır Ağa b. Mustafa mahzarında ikrâr ve takrîr-i kelâm edip bundan akdem müteveffât olan vâlidemiz Emine bt. Abdullah nâm hatun irs-i şer‘le bana ve hemşirem mezbûre Fâtıma Hatun’a intikāl edip Üsküdar kazâsına tâbi‘ Bulgurlu nâm karye kurbünde Kısıklı nâm mevzi‘de vâki‘ Defterdâr Çiftliği demekle ma‘rûf olup lede’l-ahâlî ve’l-cîrân ma‘lûmü’l-hudûd olan büyût-ı müte‘addideyi müştemil menzilden ve yine mevzi‘-i mezbûrda ma‘lûmü’l-hudûd ve’l-kat‘ bağlardan hisse-i şer‘iyye-i sâbıkālarımı bin altmış bir senesinde Mahmud Paşa nâibi olan Abdüllatif Efendi huzûrunda bi-safkatin vâhidetin elli kıt‘a riyâlî guruşa bâtten bey‘ ve teslîm ve kabz-ı semen eyleyip kadîmden çiftlik-i mezbûra tâbi‘ olan [61a] mezâri‘ ve merâti‘in dahi hakk-ı tasarruflarını ma‘rifet-i sâhib-i arz ile yine mezbûre Fâtıma Hatun’a tefvîz edip ol dahi tefevvüz ve kabûl eylemiş idi. Mezbûre Fâtıma Hatun’a sen bana bu çiftlikde olan hissen ancak elli guruş eder deyü beni ta‘zîr eyledin ve vâlidemizin muhallefâtına sen vâzı‘atü’l-yed oldun deyip da‘vâ sadedinde idim. El-hâletü hâzihî mezbûre Fâtıma Hatun bin beş yüz nakd râyic fi’l-vakt fıddî akçe üzerine benimle inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr bin beş yüz akçeyi tamamen yedinden ahz u kabz edip çiftlik-i mezbûr ve vâlidemizin muhallefâtına müte‘allik da‘vâdan zimmetini ibrâ ve ıskāt eyledim min-ba‘d da‘vâm kalmadı, eğer da‘vâ dahi edersem istimâ‘ olunmaya dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’r-râbi‘ ve’l-ışrîn min-Şa‘bâni’l-mu‘azzam li-sene erba‘a ve sittin ve elf. Şuhûdü’l-hâl: Subaşı Ağa Çelebi, Osman Çelebi b. Ömer, Bekir Çelebi b. Osman, Ali Çelebi b. Osman, Ali Beşe çukadâr, İbrahim Çelebi b. Davud, Mustafa b. Yusuf, Perviz Ağa kethüdâ-yı Akbudak, Mustafa Bey sarrac.