Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 230 Hüküm no: 226 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’ın Mustafa b. Hasan’da olan alacağına kefil olan karısı ve oğlunun ellerinde olan cariye ve eşyalarını borclarıyla takas ettikleri Ma‘rûz. Sahib-i arzuhâl Süleyman meclis-i şer‘de derûn-ı i‘lâmda mezkûr Mustafa b. Hasan’ın zevcesi Âişe ve kebîr oğlu Ömer mahzarlarında mezbûr Mustafa zimmetinde ber-mûceb-i i‘lâm edâsına tenbîh olunan yüz on üç guruşa bi’l-emr ve’l-kabû[l] mezbûrân Ömer ve Âişe kefîl olmalarıyla yedlerinde mülkleri olan Acemiyetü’l-asl Gülbûy nâm bir re’s câriyelerini seksen guruşa ve bir tüfenklerini on sekiz guruşa bana bey‘ ve teslîm ve semenleri olan cem‘an doksan sekiz guruşu min-ciheti’l-kefâle deynleri olan meblağ-ı mezkûru ol mikdârına takās ve mahsûb eylediklerinde ben dahi ber-vech-i muharrer iştirâ ve tesellüm ve mukāssa ve kabûl edip mâ‘adâ on beş guruşu târih-i i‘lâmdan doksan bir gün tamamında edâ etmek üzere mezbûrânı tecîl eyledim dedikde mezbûrân dahi kabûl ve meblağ-ı mezbûr on beş guruşu müddet-i mezkûre tamamında edâya ta‘ahhüd ve kat‘-ı nizâ‘ ettikleri tescîl ve bi’l-iltimâs huzûr-ı âlîlerine i‘lâm olundu. Fî 11 min-Şevval sene 1143. Bu mahâlden izzetli sa‘âdetli imâm-ı sultânî hazretlerinin zamân-ı sa‘âdetlerinde vâki‘ i‘lâmlardır.