Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 231 Hüküm no: 227 Orijinal metin no: [56b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un ölen kocası Mehmed’in Rubin isimli Yahudide alacağı olduğu iddiasıyla açtığı davadan vazgeçtiği Ma‘rûz. Müteveffâ el-Hâc Mehmed’in zevce-i metrûkesi olup kendi nefsinden asâleten ve sulbî oğlu Mehmed ve sulbiye kızı Fâtıma nâm sagīrlerin tesviye-i emirlerine kıbel-i şer‘den mansûbe vasîleri olan vâlideleri sahibet-i arzuhâl Zeyneb Hatun meclis-i şer‘de tüccâr tâifesinden derûn-ı arzuhâlde mezkûrü’l-ism Rubin v. İlya nâm Yahûdî muvâcehesinde yüz otuz dokuz senesi târihiyle müverrah bir kıt‘a temessük nâtık olduğu üzere müteveffâ-yı mezbûrun mesfûr Yahûdî zimmetinde iki bin beş yüz guruş hakkı olmağın asâleten ve vesâyeten taleb ederim deyü da‘vâ ve mezbûr Rubin cevâbında ben târih-i mezkûrda medîne-i Selanik’de ticâret vechi üzere sâkin idiğini şöhret ve tevâtür ile isbât ederim, deyn-i mezkûrdan kat‘a haber ve âgâhım yokdur müdde‘iyye-i mezbûre da‘vâ-yı mezkûresinde mubtıledir deyü da‘vâyı def‘ ve def‘-i mezkûrunu beyân sadedinde iken mezbûre Zeyneb Hatun zikrolunan temessükü ahz ve şak edip mesfûr Yahûdî ile husûs-ı mezkûra müte‘allika da‘vâ ve nizâ‘ım yokdur dediği tescîl ve mübâşirleri Baltacı Mehmed Çavuş kulları iltimâsıyla huzûr-ı âlîlerine i‘lâm olundu. Fî 18 Ra sene 1143.