Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 232 Hüküm no: 229 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi vakfından olup Haçador v. Bogos’un vefa yoluyla verdiği evin tasarrufu konusundaki davada sulh olduğu Sulh. Mahmiye-i İstanbul’da Kâtib Kasım mahallesi mütemekkinlerinden Haçador v. Bogos nâm zimmî meclis-i şer‘-i hatîr-i lâzımü’t-tevkīrde ashâb-ı hâze’l-kitâb İpekçi Bogos v. Hazer ve Sırmabıyık Avanis v. Sergiz ve Eskici Haçir v. İvaz ve kuyumcu Abraham v. Avak nâm zimmîler muvâcehelerinde ikrâr-ı tâm ve takrîr-i kelâm edip İbrahim Efendi nâm sahib-i hayrın vakfından olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât vakıf menzil bi’l-icâreteyn taht-ı tasarrufumda iken menzil-i mezbûru târih-i kitâbdan beş sene mukaddem iki yüz on yedi guruş deyn mukābelesinde mesfûr İpekçi Bogos’a her ne zaman akçesin kendiye edâ edersem menzil-i mezbûru yine bana fâriğ olmak şartıyla fâriğ olduğumdan sonra mesfûr Bogos menzil-i mezbûru ben diyâr-ı âharda iken mesfûr Sırmabıyık Avanis zimmîye bâ-ma‘rifet-i mütevellî bedel-i ma‘lûm mukābelesinde fâriğ ol dahi kezâlik bedel-i ma‘lûm mukābelesinde bâ-ma‘rifet-i mütevellî merkūm Eskici Haçir zimmîye fâriğ ol dahi kezâlik bedel-i ma‘lûm mukābelesinde mesfûr Kuyumcu Abraham zimmîye fâriğ olmağla menzil-i mezbûra vâzı‘u’l-yed olmağın hâlâ ben dahi menzil-i mezkûru mesfûr Abraham zimmîden taleb ve da‘vâ sadedinde olduğumda mesfûr Abraham zimmî dahi cevâbında “sen menzili mezkûru târih-i merkūmda ber-vech-i muharrer mezbûr İpekçi Bogos’a vefâen fâriğ olduğunda eğer deyn-i mezkûru târih-i merkūmdan altı ay tamamına değin edâ edemezsem zevcem Sâre bt. Maksud nâm Nasrâniye tarafımdan vekîlim olup menzil-i mezkûru bedel-i misli ve ma‘rifet-i mütevellî ile âhara ferâğ ve deyn-i mezkûru edâ ve fazlasını ahz u kabz eylesin” deyü zevcen gāibe ani’l-meclis Sâre nâm Nasrâniyeyi vekîl etmekle ol dahi ba‘de hulûl elimde menzil-i mezkûru mesfûr İpekçi Bogos’un ma‘rifet ve teslîmiyle bâ-ma‘rifet-i mütevellî mesfûr Avanis zimmîye ol dahi mesfûr Haçir’e ol dahi bana bi’l-vekâle fâriğ olmuşdur deyü def‘e tesâddî etmekle beynimizde münâza‘ât-ı kesîre cereyân etmişidi. El-hâletü-hâzihi muslihûn tavassut edip da‘vâ-yı mezkûremden beni mesfûrûn zimmîler ile elli sekiz guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr elli sekiz guruşu yedlerinden ahz u kabz edip menzil-i mezkûra ve târih-i kitâba gelince sâir beynimizde cârî ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebât ve muhâsamâtdan ben mesfûrûn Bogos ve Avanis ve Haçir ve Abraham zimmîleri ibrâ-i âmm-ı râfi‘u’l-hısâm ile ibrâ ve ıskāt eylediğimde onlar dahi kezâlik bedel-i sulh-ı mezbûra ve târih-i kitâba gelince sâir beynimizde cârî ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan beni ibrâ ve ıskāt etmeleriyle min-ba‘d bir birilerimiz ile kat‘a da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Zilhicceti’ş-şerîfe sene [1]143. Şuhûdü’l-hâl: Molla Mehmed b. İbrahim el-müezzin, Berber es-Seyyid Osman Çelebi b. Mehmed, Berber Mehmed Çelebi b. Ömer, es-Seyyid Mustafa Çelebi b. Mehmed, Mustafa Ağa b. Abdullah, Mustafa Efendi b. Nasuh imâm-ı Kâtib Kasım, Mehmed Çelebi b. Abdullah, Mustafa Çelebi b. Ali, Du‘âcı İbrahim Çelebi b. Mustafa, Süleyman Beşe b. Ali.