Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 233 Hüküm no: 230 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Ağası Ahmed Ağa vakfından İbrahim’in evinin yarım hissesini karısına sattığı Mahmiye-i İstanbul’da Müfti Ali Çelebi mahallesinde sâkine el-Hâc İbrahim b. Mehmed nâm kimesne meclis-i şer‘-i şerîf-i enverde işbu Hâfızetü’l-kitâb zevce-i menkûhası Gülbûy bt. Abdullah nâm hatun mahzarında ikrâr-ı tâm ve takrîr-i kelâm edip arsası merhûm İstanbul Ağası el-Hâc Ahmed Ağa vakfından icâre-i mu‘accele ve beher mâh otuzar akçe ücret-i müeccele ile nısfı benim ve nısf-ı âharı zevce-i menkûham Fâtıma bt. Mehmed nâm hatunun taht-ı tasarrufumuzda ve ebniyesi kezâlik mezbûre Fâtıma Hatun ile ale’l-iştirâki’s-seviy silk-i mülkümüzde münselik olup mahalle-i mezbûrede vâki‘ bir tarafı Akkaş Ahmed Çelebi menzili ve bir tarafı el-Hâc İbrahim mülkü ve ba‘zen odalar ve bir tarafı tarîk-ı âm ile mahdûd bir bâb fevkānî oda ve bir bâb tahtânî oda ve bir sofa ve kenîfi müştemil menzilin ebniyesinde olan nısf hisse-i şâyi‘amı bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile zevcem mezbûre Gülbûy nâm hatuna altmış guruşa bey‘ ve temlîk ve teslîm ve arsasında olan nısf hissemi bâ-izn-i mütevellî meccânen ferâğ ve tefvîz edip mezbûre Gülbûy dahi iştirâ ve temellük ve tesellüm ve tefevvüz ve kabûl eyledikden sonra semeni olan meblağ-ı mezbûr altmış guruş mutâlebesinden zevcem mezbûre Gülbûy Hatun’un zimmetini ibrâ ve ıskāt eyledim. Ba‘de’l-yevm menzil-i mezbûrun ebniyesinde olan nısf hissem mezbûre Gülbûy Hatun’un mülk-i müşterâsı ve arsasında olan nısf hissem dâhil-i havza-i tasarrufu [57b] olmuşdur. Keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Zilhicceti’ş-şerîfe sene [1]143. Şuhûdü’l-hâl: el-Hâc Ahmed b. Şa‘ban, el-Hâc Mustafa b. Hasan, Hasan Çelebi b. Ali, Mustafa Ağa b. Süleyman, İbrahim Çelebi b. Osman, Mehmed Çelebi b. Abdullah, Kādızâde İbrahim du‘âcı.