Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 238 Hüküm no: 236 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman olan Ayşe’nin küçük kızı Sâliha için nafaka talebi Nafaka. Mahmiye-i İstanbul’da Topkapısı kurbünde Bâyezidağa mahallesi sâkinelerinden olup bundan akdem şeref-i İslâmla müşerrefe olan Âişe bt. Abdullah nâm mühtediye zâtı ta‘rîf-i şer‘î ile mu‘arrefe olduğu hâlde meclis-i şer‘-i şerîf-i enverde sâbıkā zevci Yasef v. Harun v. Yasef nâm Yahûdî’nin babası ve tarafından husûs-ı âti’z-zikre vekîl olduğu diğer Yasef v. Menteş ve âhar Yasef v. Benyamin nâm Yahûdiler şehâdetleriyle şer‘an sâbit olan merkūm Yasef muvâcehesinde takrîr-i kelâm ve bast-ı merâm edip müvekkil-i mezbûrun firâşından hâsıla ve benden mütevellide bi-hakkı’l-hıdâne hacr ve terbiyemde olan sadriye kızım işbu Sâliha nâm sagīrenin mâlı olmamağla sagīre-i mezbûrenin nafaka ve kisve vesâir levâzım-ı zarûriyesiʼçün babası müvekkil-i mezbûr Yasef üzerine kıbel-i şer‘den kadr-ı kifâye akçe farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri sagīre-i mezbûre Sâliha’nın nafaka ve kisve vesâir levâzım-ı zarûriyesiʼçün babası müvekkil-i mezbûr Yasef üzerine bi’t-terâzî târih-i kitâbdan yevmî on iki akçe farz ve takdîr buyurup meblağ-ı mefrûz-ı mezbûru ber-vech-i muharrer sagīre-i mezbûrenin nafaka ve kisve vesâir levâzım-ı zarûriyesiʼçün harc ve sarfa ve vakt-i zarûretde istidâneye ve lede’z-zafer babası müvekkil-i mezbûr Yasef üzerine rücû‘a mezbûre Âişe Hatun’a izin birler mâ-hüve’l-vâki‘ bi’t-taleb ketb olundu. Fî 16 min-Zilhicceti’ş-şerîfe sene [1]143. Şuhûdü’l-hâl: Mehmed Çelebi b. Abdullah, Ahmed Haseki el-mübâşir, Mustafa b. Hasan, Ahmed b. Mehmed, Du‘âcı İbrahim b. Mustafa.