Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 237 Hüküm no: 235 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akovalı Mehmed Ağa’nın Akbıyık mahallesinde bulunan evini sattığı Mübâya‘a. Bâ-imzâ-i hazret-i efendi. Mahmiye-i İstanbul’da Akbıyık mahallesinde sâkin Akovalı demekle ma‘rûf Mehmed Ağa b. İbrahim meclis-i şer‘-i hatîr-i lâzımü’t-tevkīrde bâ‘isü’l-kitâb fahrü’l-eşbâh Cevher Ağa b. Abdülmennan mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ tarafları Telhîsî Mustafa Ağa ve Vezîrağası İbrahim Ağa ve tarîk-ı âm ile mahdûd hâriciyede bir bâb fevkānî oda vustâda üç bâb oda ve dehliz ve tahtında ahır ve bi’r-i mâ ve dâhiliyede fevkānî bir köşk ve vustâda iki oda bir sofa ve tahtânî bir oda ve iki taş oda ve iki kilâr ve hamam ve câmekân ve matbah ve havlu ve bi’r-i mâyı müştemil mülk menzilimi tarafeynden îcâb ve kâbûlü hâvî şürût-ı müfsideden ârî bey‘-ı bâtt-ı sahîh-i şer‘î ile üç bin yüz guruşa mezbûr Cevher Ağa’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr üç bin yüz guruşu müşteri-yi merkūm yedinden bi’t-tamam ve’l-kemâl ahz u kabz eyledim. Fîmâ-ba‘d menzil-i mahdûd-ı mezkûr cümle tevâbi‘ ve levâhıkıyla mezbûr Cevher Ağa’nın mülk-i müşterâsı ve hakk-ı sırfı olup kat‘a benim alâka ve medhalim kalmamışdır. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-Zilhicce sene [1]143. Şuhûdü’l-hâl: Fahrü’l-eşbâh Mustafa Ağa b. ( ) silâhşör-i şehriyârî, Fahrü’l-akrân Ömer Ağa b. Mehmed silâhşör-i şehriyârî, Umdetü’l-mevâli’l-izâm ser cerrâhân-ı hâssa Süleyman Efendi, Fahrü’l-akrân Kapudan Süleyman Ağa silâhşör-i şehriyârî, Umdetü erbâbü’t-tahrîr ve’l-kalem Ali Efendi mevkūfâtî, Baba Mustafa Ağa b. Abdullah, Hamamcı Mehmed Ağa b. Abdullah, Mehmed Ağa b. Mehmed kethudâ-yı muhzırân, Salih Çelebi b. Süleyman el-muhzır.