Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 239 Hüküm no: 238 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başbakikulu Halil Ağa ile Revan Ağası Hasan Ağa arasındaki cariye davası Sulh. Zümre-i silâhdârânın sâbıkā Revan Ağası olan fahrü’l-eşbâh Hasan Ağa b. Ahmed meclis-i şer‘-i şerîf-i enverde bi’l-fi‘il Başbâkīkulu umdetü’l-emâcid ve’l-ekârim zübdetü’l-efâhim ve’l-e‘âzım sahib-i hâze’l-kitâb Halil Ağa b. Ahmed b. Abdurrahman tarafından husûs-ı âti’l-beyâna vekîl-i şer‘îsi el-Hâc Yusuf b. Abdullah mahzarında ikrâr-ı tâm ve takrîr-i kelâm edip târih-i kitâbdan beş sene mukaddem müvekkil-i mûmâ-ileyh yedimde mülk ve hakkım olan beş yüz guruş kıymetli Gürciyyetü’l-asl câriyemi bi-gayr-ı hakkın ahz etmekle hâlâ zikrolunan câriye mevcûd ise aynını değil ise ba‘de’s-sübût kıymet-i şer‘iyesini müvekkil-i mûmâ-ileyhden taleb ve da‘vâ eylediğimde ol dahi inkâr etmeğin beynimizde nizâ‘-ı küllî cereyân etmişidi. El-hâletü-hâzihi beynimize muslihûn tavassut edip da‘vâ-yı mezkûremden beni müvekkil-i mûmâ-ileyh ile iki yüz otuz guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki yüz otuz guruşu müvekkil-i mûmâ-ileyhin mâlından olmak üzere vekîl-i merkūm bi’t-tamam ve’l-kemâl bana def‘ ve teslîm edip ben dahi ber-vech-i muharrer kabz ve tesellüm eylediğimden sonra husûs-ı mezkûra müte‘allika âmme-i de‘âvî ve kâffe-i mutâlebât ve eymân ve muhâsamâtdan müvekkil-i mûmâ-ileyhin zimmetini ibrâ-i <> âmm-ı râfi‘u’l-hısâm ile ibrâ ve ıskāt eylediğimde ol dahi kabûl etmeğin fîmâ-ba‘d husûs-ı mebzûra müte‘allika müvekkil-i mûmâ-ileyh ile bi-vechin mine’l-vücûh da‘vâ ve nizâ‘ ve husûmetim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-Zilhicce sene [1]143. Şuhûdü’l-hâl: Başkâtib İmâmzâde Mustafa Efendi b. el-merhûm Yunus Efendi, Ali Ağa b. Mehmed Çavuş silâhdâr, Hoca İbrahim Efendi, Mehmed Efendi b. İbrahim Efendi, Mehmed Çelebi b. Ahmed, Mehmed Çelebi b. Hasan, Mehmed Çelebi b. Abdullah.