Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 240 Hüküm no: 239 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arım nâhiyesinde Necmeddin zeameti gelirinin tahsil için Ali Zâim Ağa ile kardeşi Mustafa Ağa arasındaki alacak davası Vilâyet-i Anadolu’da Canik Sancağı’nda vâki‘ Erim nâhiyesi ahâlîsinden olup mahmiye-i İstanbul’da Parmakkapı kurbünde müsâfiren sâkin bâ‘isü hâze’l-kitâb Ali Za‘îm Ağa b. Ali nâm kimesne meclis-i şer‘-i hatîr-i lâzımü’t-tevkīrde li-ebeveyn er karındaşı Mustafa Ağa b. el-mezbûr Ali Ağa nâm kimesne mahzarında üzerine da‘vâ ve takrîr-i kelâm edip nâhiye-i mezbûrede vâki‘ hâlâ bâ-berât-ı âlîşân mutasarrıf olduğum Necmeddin ze‘âmeti demekle ma‘rûf ze‘âmetimde karındaşım mezbûr Mustafa Ağa bin yüz kırk bir senesi[nde] tarafımdan subaşı olmağla ze‘âmet-i mezbûrenin a‘şâr-ı şer‘iye ve rüsûm-ı örfiyesinden bâkī zimmetinde ba‘de külli’l-hesâb bana beş yüz guruş deyni olmağla suâl olunup meblağ-ı mezbûr beş yüz guruşu bana edâ ve teslîme tenbîh olunmak murâdımdır dedikde gıbbe’s-suâl mezbûr Mustafa Ağa cevâbında sene-i mezbûrede karındaşı müdde‘î-yi mezbûrun mutasarrıf olduğu ze‘âmet-i mezbûresinde tarafından subaşısı olup a‘şâr-ı şer‘iye ve rüsûm-ı örfiyesinden beş yüz guruş makbûzu olup karındaşı müdde‘î-yi mezbûr Ali Zâ‘îme ol mikdâr deyni olduğunu ikrâr lâkin karındaşım müdde‘î-yi mezbûrun Molla Mustafa ve Sarrâcoğlu ve İsmail Ağa nâm kimesnelere yüz elli dört guruş deyni olmağla meblağ-ı mezbûr yüz elli guruşu dâyinlerim merkūmûna edâ eyle deyü sene-i mezbûrede karındaşım mezbûr diyâr-ı Acem’den bana mektûb gönderip emretmekle ben dahi emr-i mezkûruna binâen meblağ-ı mezbûr beş yüz guruşun yüz elli dört guruşunu dâyinleri mezbûrûna verip ber-vech-i muharrer yüz elli dört guruş deynini edâ etmemle meblağ-ı mezbûrdan zimmetimde üç yüz otuz altı guruş deynim bâkī kalmışdır deyicek gıbbe’l-istintâk mezbûr Ali Za‘îm ber-vech-i muharrer emr-i mezkûrunu inkâr eylediğinden mâ‘adâ sene-i mezbûrede ben diyâr-ı Acem’den nâhiye-i mezbûreye geldiğimde ze‘âmet-i mezbûre mahsûlünden ber-vech-i muharrer ba‘de külli’l-hesâb bana zimmetinde beş yüz guruş zimmetinde deyni olduğunu kirâren ve mirâren ikrâr dahi etmişdir deyü def‘ edicek gıbbe’l-istintâk mezbûr Mustafa Ağa bi’l-külliye inkâr edicek müdde‘î-yi mezbûr Ali Za‘îm def‘-i mezkûrunu beyâna havâle olunup ikrâr-ı mertebesi olan meblağ-ı mezbûr üç yüz otuz altı guruşu karındaşım müdde‘î-yi mezbûr Ali Za‘îm’e edâ ve teslîme mezbûr Mustafa Ağa’ya tenbîh birle mâ-vaka‘a bi’t-taleb ketb olundu. Fî 17 min-Zilhicceti’ş-şerîfe sene [1]143. Şuhûdü’l-hâl: Abdullah Efendi b. Mehmed, es-Seyyid Abdurrahman Efendi b. Abdullah, Molla Nuh b. Hüseyin, Mehmed Çelebi b. Abdullah, İbrahim b. Mustafa du‘âcı.