Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 264 Hüküm no: 267 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın Mimarayas mahallesinde bulunan ev ve arsasını sattığı Mübâya‘a. Mahmiye-i İstanbul’da Mi‘mâr Ayas mahallesi sâkinlerinden Mustafa Ağa b. Mehmed nâm kimesne meclis-i şer‘-i şerîfde fahrü’l-muhadderât bâ‘isetü hâzihi’l-vesîka Fâtıma bt. Mehmed Ağa b. Abdurrahman nâm hatunun zevci ve tarafından husûs-ı âti’l-beyâna vekîl olduğu Ömer b. Halil ve İbrahim b. Osman nâm kimesneler şehâdetleriyle şer‘an sâbit olan Silâhşör-i şehriyârî umdetü’l-eşbâh ve’n-nezâir Mehmed Bey b. el-merhûm Hasan Paşa mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan el-Hâc Ahmed menzili ve bir tarafdan Kapudan Mehmed menzili ve bir tarafdan el-Hâc Mehmed tasarrufunda olan vakıf menzil ve bir tarafdan tarîk-ı âm ile mahdûd ve ulyâda bir bâb oda ve iki sofa ve vustâda bir oda ve süflâda bir oda ve matbah ve bi’r-i mâyı muhtevî mülk menzili bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-ı bâtt-ı sahîh-i şer‘î ile müvekkile-i mûmâ-ileyhâ Fâtıma Hatun’a dört yüz elli guruşa bey‘ ve temlîk ve teslîm ve hudûd-ı mezkûr dâhilinde vâki‘ yevmî bir akçe icâre-i müeccele ile merhûm Sunullah Efendi vakfından tasarrufunda olan arsa-i hâliyemi bâ-ma‘rifet-i mütevellî elli guruş bedel mukābelesinde yine mûmâ-ileyhâ Fâtıma Hatun’a ferâğ ve tefvîz ol dahi ber-vech-i muharrer iştirâ ve temellük ve tesellüm ve tefevvüz ve kabûl eylediğinden sonra semen-i mezbûr ile bedel-i merkūm cem‘an beş yüz guruşu müvekkile-i mûmâ-ileyhâ mâlından olmak üzere vekîl-i müşârün-ileyh yedinden tamamen ahz u kabz eyledim. Min-ba‘d menzil-i mahdûd-ı mezkûr müvekkile-i mûmâ-ileyhâ Fâtıma Hatun’un mülk-i müşterâsı ve arsa-i mezkûre dâhil-i havza-i tasarrufu olup kat‘a benim alâka ve medhalim kalmadı. Keyfe mâ teşâ mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 Zilhicce sene [1]143. Şuhûdü’l-hâl: Simkeş el-Hâc Mehmed, İbrahim b. Mehmed, Süleyman b. Mehmed, Ahmed b. Mehmed, Arab el-Hâc Mehmed.