Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 263 Hüküm no: 266 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haseki Mustafa Ağa’nın Sultanbayezid mahallesinde bulunan ev hissesini sattığı Mübâya‘a rub‘ hisse. Mahmiye-i İstanbul’da Samatya kurbünde el-Hâc Hüseyin mahallesinde sâkin Haseki Mustafa Ağa b. Veliyüddin nâm kimesne meclis-i şer‘-i şerîf-i enverde işbu hâfızü’l-kitâb Cafer Ağa b. Ahmed b. Abdullah tarafından husûs-ı âti’l-beyânda vekîl olduğu el-Hâc İbrahim b. Osman ve İbrahim b. Mustafa nâm kimesneler şehâdetleriyle sâbit olan Ali Çelebi b. Mustafa nâm kimesne mahzarında ikrâr-ı tâm ve takrîr-i kelâm edip arsası merkūme Belkıs nâm hatun vakfına senede iki yüz kırk akçe mukāta‘a-i kadîmesi ile rub‘u benim selâse erbâ‘ı Cafer Ağa veresesinin taht-ı tasarrufumuzda ve ebniyesi kezâlik silk-i mülkümüzde münselik olup mahrûse-i Galata mahallâtından Sultan Bâyezid mahallesinde vâki‘ bir tarafdan Zeyneb Hatun menzili ve bir tarafdan el-Hâc Halil odaları ve bir tarafdan Kiryako zimmî menzili ve bir tarafdan tarîk-ı âm ile mahdûd bir bâb fevkānî oda ve bir bâb tahtânî odayı muhtevî menzilin ebniye-i memlûkesinden olan rub‘ hisse-i irsiyeli bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile müvekkil-i mezbûr Cafer Ağa’ya altmış guruşa bey‘ ve temlîk ve teslîm ve arsasında olan rub‘ hissemi bâ-izn-i mütevellî meccânen ferâğ ve tefvîz edip müvekkil-i mezbûr dahi iştirâ ve temellük ve tesellüm ve tefevvüz ve kabûl eylediğinden sonra semeni olan meblağ-ı mezbûr altmış guruşu müvekkil-i mezbûr yedinden tamamen ahz u kabz eyledim. Ba‘de’l-yevm menzil-i mahdûd-ı mezbûrun ebniyesinde olan rub‘ hissem müvekkil-i mezbûr Cafer Ağa’nın mülk-i müşterâsı ve arsasında olan rub‘ hissem dahi dâhil-i havza-i tasarrufu olmuşdur. Keyfe mâ yeşâ ve yahtâr mutasarrıfı olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Zilhicceti’ş-şerîfe sene [1]143. Şuhûdü’l-hâl: Sultan Kethudâsı Ömer Ağa b. Ali, Kimyâcı Ahmed Ağa, Hüseyin Efendi dâmad-ı Mustafa Efendi, İbrahim Çelebi b. Mustafa, Mehmed Çelebi b. Abdullah.