Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 270 Hüküm no: 276 Orijinal metin no: [67a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tolça kalesinde mahpus bulunan sâbık Arpa Emini Hacı Veliyüddin Efendi’nin alacağını vekili vâsıtasıyla tahsil ettiği Sâbıkā Arpa emîni olup hâlâ Tolça kal‘asında bâ-fermân-ı âlî mahbûs olan el-Hâc Veliyüddin Efendi b. Ali Bey b. Zeynel’in babası tarafından husûs-ı âti’z-zikre vekîl olduğu el-Hâc Hızır b. el-Hâc Ali ve Hasan Ağa b. el-Hâc Ahmed nâm kimesneler şehâdetleriyle sâbit ve sübût-i vekâletine hükm-i şer‘î lâhık olan mezbûr Ali Bey meclis-i şer‘-i şerîf-i enverde hâlâ Şıkk-ı evvel Defterdârı umdetü erbâbü’t-tahrîr ve’l-kalem zübdetü ashâbi’t-tastîr ve’r-rakām sa‘âdetlü ve semâhatlü Ali Beyefendi b. el-merhûm dâmad-ı Mehmed Paşa tarafından ber-vech-i âtî mübâşir ta‘yîn buyrulan bâ‘isü hâze’l-kitâb el-Hâc Osman Ağa b. Mehmed mahzarında bi’l-vekâle ikrâr ve takrîr-i kelâm edip oğlum müvekkil-i mezbûrun müşârün-ileyh efendi hazretleri ma‘rifetiyle cânib-i mîrîyle olan ahz u i‘tâları hesâb olundukda cânib-i mîrîde zuhûr eden iki bin sekiz yüz seksen dokuz guruş hakkı müşârün-ileyh efendi hazretleri taraf-ı şerîflerinden ta‘yîn buyrulan mezbûr el-Hâc Osman Ağa ve karındaşı gāib ani’l-meclis el-Hâc Hamza Ağa mübâşeretleriyle cem‘ ve tahsîl ve bana def‘ ve teslîm ben dahi mezbûrân yedlerinden meblağ-ı mezbûr iki bin sekiz yüz seksen dokuz guruşu tamamen bi’l-vekâle ahz u kabz eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurreti Muharremi’l-harâm sene [1]144. Şuhûdü’l-hâl: Mehmed Çelebi b. Abdullah, Du‘âcı İbrahim Çelebi b. Mustafa, Mehmed Ağa b. Ahmed tahtarevâncıbaşı, Mehterbaşı Ali Ağa, el-Hâc Ahmed bakkāl, Hüseyin Çelebi bakkāl.