Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 271 Hüküm no: 277 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Güdül’e tâbi Keşanoz köyünden Mahmud b. Hasan’dan çocuklarına intikal eden değirmenin tasarruf hakkı Vilâyet-i Anadolu’da Ayaş kazâsına tâbi‘ Güdül <> nâhiyesinde Keşanoz nâm karye ahâlîsinden olup mahmiye-i İstanbul’da müsâfiren sâkin İsmail b. Mahmud meclis-i şer‘-i hatîr-i lâzımü’t-tevkīrde işbu bâ‘îsü’l-kitâb karındaşı Hasan mahzarında üzerine da‘vâ ve takrîr-i kelâm edip karye-i mezkûre hudûdu dâhilinde vâki‘ Kabadeğirmeni demekle ma‘rûf lede’l-ahâlî ve’l-cîrân ma‘lûmü’l-hudûd mülk değirmen babamız müteveffâ-yı mezbûr Mahmud’un mülkü olup ba‘de vefâtihî bize vesâir karındaşlarımız Mehmed ve Mustafa ve Hüseyin ve kız karındaşım Zahide ve vâlidem Fâtıma’ya ırsen intikāl etmiş iken karındaşım merkūm Hasan zikrolunan değirmenden on sehim i‘tibârıyla iki sehmini yirmi seneden beri müstakillen bi-gayr-ı hakkın zabt ve tasarruf etmekle mezbûr Hasan’a suâl olunup mârrü’z-zikr iki sehimden kasr-ı yed ve yedinde müctemi‘ benim hisseme isâbet eden ma‘lûmü’l-mikdâr galleden hissemi mahâllinde bana teslîme tenbîh olunmak matlûbumdur dedikde gıbbe’s-suâl mezbûr Hasan cevâbında babam müteveffâ-yı mezbûr Mahmud b. Hasan b. Abdullah târih-i kitâbdan yirmi sene mukaddem hâl-i sıhhatinde mahzar-ı Müslimînde zikrolunan değirmenden on sehim i‘tibârıyla iki sehmini bana hîbe ve temlîk ve teslîm ben dahi ittihâb ve temellük ve tesellüm ve kabz ve kabûl etmişidim deyü def‘le mukābele ve mazmûnu min-külli’l-vücûh takrîr-i meşrûhuna mutâbık bir kıt‘a hüccet ibrâz edicek gıbbe’l-istintâk ve’l-inkâr müdde‘î-yi mezbûr Hasan’dan def‘-i mezkûrunu mübeyyine beyyine taleb olundukda udûl-i ahrâr-ı ricâl-i Müslimînden yine karye-i mezbûre ahâlîlerinden olup mahmiye-i mezbûrede müsâfiren sâkinler İbrahim Çelebi b. Halil ve Mehmed Bey b. Merdân nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka <> müteveffâ-yı mezbûr Mahmud b. Hasan b. Abdullah târih-i kitâbdan yirmi sene mukaddem hâl-i sıhhatinde zikrolunan <> Kabadeğirmeni demekle ma‘rûf değirmenden on sehim i‘tibârıyla iki sehmini ber-mûceb-i hüccet bizim huzûrumuzda mezbûr Hasan’a hîbe ve temlîk ve teslîm eylediğinde ol dahi ber-vech-i muharrer ittihâb ve temellük ve tesellüm ve kabz ve kabûl eyledi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’r-râbi‘ min-Muharremi’l-harâm li-sene erba‘a ve erba‘în ve mie ve elf. Şuhûdü’l-hâl: Ahmed Ağa b. ( ), Mahmud b. Yusuf, Osman b. Mehmed, Mahmud b. Hasan, İsa b. Mehmed, Hasan b. Ahmed, Mehmed Çelebi b. Abdullah ser-tahta, İbrahim b. Mustafa du‘âcı, Mehmed Çelebi b. Abdullah.