Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 284 Hüküm no: 293 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüdavendiğar vakfı Cebeleyn eski kâtibi Osman Halîfe ile şimdiki kâtibi Ahmed arasındaki ücret anlaşmazlığı Ma‘rûz. Nezâret-i aliyyelerinde olan evkāfdan Bursa’da Hüdavendigar tâbe serâhu evkāf-ı şerîfelerinin kâtib-i evveli olan Osman Halîfe ile vakf-ı mezbûrdan Cebeleyn kitâbetine mutasarrıf olan Ahmed huzûr-ı âlîlerinde ma‘kūd meclis-i şer‘de terâfu‘ ve yedlerinde olan urûz ve senedâta nazar olundukda mezbûr Osman kâtib-i evvel olmağla cemî‘ umûr-ı vakf kâtib-i evvel kalemiyle tahrîr ve defter oluna geldiği ve Cebeleyn-i mezkûr kâtibi olan mezbûr için vazîfe-i mu‘ayyenesi ve cerresinden mâ‘adâda alâka ve medhali olmadığı lede’l-mürâfa‘a ibrâz eyledikleri senedât ile müte‘ayyin olduğundan mâ‘adâ mezbûrân bundan akdem Bursa Kādısı Mehmed Reşid Efendi dâ‘îleri huzûrunda mürâfa‘a ve mezbûr Ahmed mu‘ârazadan men‘ olunduğunu nâtık merkūm Osman Halîfe yedinde hüccet-i şer‘iye ve i‘lâm ve mütevellî-yi vakf inhâsı dahi olmağla yedinde olan senedât ve hüccet-i şer‘iye ve i‘lâmlar mantûkunca mezbûr Ahmed merkūm Osman Halîfe’nin kitâbeti umûruna müdâhaleden men‘ ve yedinde olan beratının mahâllinden terkīni emr-i savâb idiği ma‘lûm-ı devletleri buyruldukda ol bâbda re’y ve fermân hazret-i veliyyü’l-emrindir. Fî 26 Zilka‘de sene [1]143.