Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 283 Hüküm no: 292 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın Yağlıkcı Mehmed’e olan borcunun ödenmesi Bâ-imzâ-i hazret-i efendi. Sadrazam-ı sâbık merhûm İbrahim Paşa’nın kethudâsı müteveffâ Mehmed Paşa b. el-Hâc Mustafa [b.] Abdurrahman’ın dâyinlerinden râfi‘u’l-kitâb Yağlıkcı el-Hâc Mehmed b. el-Hâc Mustafa nâm kimesne meclis-i şer‘-i şerîf-i enverde müteveffâ-yı merkūmun emvâl ve eşyâsı taraf-ı mîrîden kabz olunmağla ashâb-ı hukūk ile mürâfa‘a ve ba‘de’l-isbât düyûnunu îfâya hâlâ Şıkk-ı evvel defterdârı izzetlü Ali Efendi hazretlerinin re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı merkūm Mehmed Paşa b. el-Hâc Mustafa b. Abdurrahman’ın yedimde olan müfredât defteri mantûkunca kendilere bey‘ emriyle mahâllinde teslîm eylediğim ma‘lûmü’l-mikdâr kılabdanlı frenk-pesend peşkünü ve dülbend örtüsü vesâir yağlıkcı metâ‘ı semenlerinden üç bin yüz on guruş hakkım olup hatta müteveffâ-yı merkūm hayatında meblağ-ı mezbûr zimmetlerinde bana deynleri olduğunu alâ-ruûsi’l-işhâd ikrâr ve işhâd dahi edip kable’l-edâ fevt olmağla tereke-i vâfiyesinden taleb ederim suâl olunup edâsıyla tenbîh olunmak murâdımdır dedikde gıbbe’s-suâl ve gıbbe’l-inkâr ve isre talebi’l-beyyine udûl-i ahrâr-ı ricâl-i Müslimînden müteveffâ-yı merkūmun hayatında etbâ‘ından Seyfullah b. Abdullah ve Miftâhî Mustafa Ağa b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında mülk-i mezbûr Yağlıkcı el-Hâc Mehmed’den iştirâ olunup emrimle mahâlline teslîm eylediği ma‘lûmü’l-aded kılabdanlı frenk-pesend peşkünü ve dülbend örtüsü vesâir yağlıkcı metâ‘ı semenlerinden yedinde olan müfredât defteri mantûkunca mezbûr el-Hâc Mehmed’e zimmetimde üç bin yüz on guruş vâcibü’l-edâ deynimdir deyü bizim huzûrumuzda ikrâr ve bizi işhâd eylemişidi. Biz bu husûsa [bu] vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebiyle <> ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘de li-sene selâse ve erba‘în ve mie ve elf. Şuhûdü’l-hâl: Ömer Çelebi b. Halil haffâf, el-Hâc Abdullah b. el-Hâc Hüseyin yorganî, el-Hâc Mustafa b. İbrahim sarrâc, el-Hâc İbrahim b. Receb benev [mûytâb], Mehmed Bey b. Mehmed, el-Hâc Mustafa Ağa b. Abdullah vekîlharc, Hasan b. Süleyman, Abdülbaki b. İbrahim.