Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 285 Hüküm no: 296 Orijinal metin no: [71a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cebeci Osman Beşe’yi öldürdüğü iddiasıyla Yusuf Beşe aleyhine açılan davanın sulhla sonuçlandığı Ma‘rûz. Mumcu Yusuf Beşe mübâşeretiyle Bâb Mahkemesi’ne ihzâr olunan Dergâh-ı âlî yeniçerilerinin otuzuncu bölüğüne mahsûs oda neferâtından Yusuf Beşe mahzarında bundan akdem cerîhan ve müteessiren vefât eden Cebeci Osman Beşe’nin hasren vârisleri olan kendi nefsinden asîl ve sagīre kızı Ümmügülsüm’ün vasîsi ve vâlidesi Fâtıma Hatun ba‘de’t-ta‘rîfi’ş-şer‘î meclis-i şer‘de târih-i i‘lâmdan yüz yirmi sekiz gün mukaddem mezbûr Yusuf Beşe zevcim mezbûr Osman’ı ber-mûceb-i i‘lâm amden ve bi-gayr-ı hakkın darb ve cerh ve katletmeğin mûceb-i şer‘îsini taleb ederim deyü ba‘de’d-da‘vâ ve’l-inkâr beyyineden âciz olmağla sulh sagīr-i mezbûre hakkında her vechile enfa‘ olmağın mezbûr Osman Beşe tavassut-ı muslihûn ile an-inkâr benimle yüz elli guruş bedel-i makbûza sulh olduğunda ben dahi sulh-ı mezbûru ba‘de’l-kabûl zevcim müteveffâ-yı mezbûrun dem ve diyetine müte‘allika âmme-i da‘vâdan bi’l-asâle mezbûr Yusuf Beşe’nin zimmetni ibrâ ve ıskāt eyledim dediği tescîl ve mübâşirleri mezbûr Yusuf Beşe iltimâsıyla huzûr-ı âlîlerine i‘lâm olundu. Fî 27 Zilka‘de sene [1]143.