Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 285 Hüküm no: 297 Orijinal metin no: [71a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ezine’den getirilen oğlak ve keçi derilerinin kadın terliği dikenler dışında kimseye satılmaması Ma‘rûz. Zenne derlik dikici hırfetinin dikici başıları es-Seyyid Cafer Çelebi ve ihtiyârlarından es-Seyyid İbrahim Çelebi ve el-Hâc Ali ve el-Hâc İsmail vesâir mazbûtü’l-esâmî on dört nefer kimesneler meclis-i şer‘-i şerîfde tüccâr tâifelerinden Ahmed Beşe ve şerîki İbrahim mahzarlarında mezbûrân Ahmed Beşe ve İbrahim vesâir tüccâr tâifesi Ezine-i Kazdağı ve âhar mahallerden mahmiye-i İstanbul’a bey‘ için getirdikleri oğlak ve erkeç beyaz sahtiyân yedimizde olan senedât mûcebince kadîmden bize mahsûs olup semen-i misilleriyle biz bey‘ ve şirâ edegelmiş iken mezbûrân Ahmed Beşe ve İbrahim tama‘-ı hâmlarından nâşî kadîme mugāyir ecânibden tâcir ve muhtekir tâifelerine hufyeten bey‘ etmeleriyle [71b] beynimizde ihtilâle bâ‘is olmuşlardır deyü her biri teşekkî eylediklerinde onlar dahi ba‘de’l-ikrâr hâlâ yedlerinde olan dokuz yüz yirmi aded oğlak ve erkeç beyaz sahtiyânlarını semen-i misilleri olan kırk altışar akçe bi’t-terâzî mezbûrâna bey‘ ve fîmâ-ba‘d mezbûrûna mahsûs mârrü’z-zikr metâ‘larını âhara bey‘ etmeyip kadîmî üzere hırfet-i mezbûre erbâbına bey‘a her biri ta‘ahhüd eyledikleri tescîl ve bi’l-iltimâs huzûr-ı âlîlerine i‘lâm olundu. Fî 27 Zilka‘de sene [1]143.