Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 286 Hüküm no: 299 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Hasan ile Mismârî Abdurrahman arasında alacak davası Ma‘rûz. Sarrâc İshak mahallesi ahâlîsinden el-Hâc Ali b. el-Hâc Hasan hasmı olup meclis-i şer‘a ihzâr ettirdiği Kurşunluhan’da sâkin Mismârî Abdurrahman b. Mehmed mahzarında merkūm Abdurrahman zimmetinde cihet-i karzdan iki bin iki yüz guruş hakkım olmağla meblağ-ı mezkûrun yedi yüz elli guruşunu ahz u kabz eyledim deyü mâ‘adâ bin dört yüz elli guruş hakkını da‘vâ eyledikde ol dahi ikrâr lâkin merkūm el-Hâc Ali kabzını i‘tirâf eylediği yedi yüz elli guruşdan mâ‘adâ bir def‘a iki yüz guruş ve bir def‘a sekiz yüz guruş ve bir def‘a dahi dört yüz elli guruş ki cem‘an bin dört yüz elli guruşu tamamen kendiye teslîm eylediğimde ol dahi yedimden kabz ve tesellüm edip meblağ-ı mezbûra müte‘allika da‘vâdan zimmetimi dahi ibrâ ve ıskāt eyledi deyü def‘le mukābele ve def‘-i mezbûrunu ba‘de’t-ta‘dîl ve’t-tezkiye şehâdetleri makbûle olan Zencirlihân’da sâkin Ömer Ağa b. Sübhanverdi ve Sultan Ahmed kurbünde sâkin Habib b. Ramazan ve Tevekkülhanı’nda sâkin Lağımcı Mehmed Beşe b. Hasan nâm kimesnelerin vech-i meşrûh üzere şehâdetleriyle şer‘an isbât etmekle mezbûr el-Hâc Ali mu‘ârazadan men‘ olunduğu huzûr-ı âlîlerine i‘lâm olundu. Fî 16 Zilhicceti’ş-şerîfe sene [1]143.