Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 286 Hüküm no: 300 Orijinal metin no: [71b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaki mahallesinden akıl hastası olan Zeyneb’in mahallelinin şikâyeti üzerine Dârü’ş-şifâ’ya konulması Ma‘rûz. Derûn-ı arzuhâlde mastûrü’l-ism Zeyneb nâm hatunun ahvâlini tefahhus için sâdır olan fermân-ı âlîlerine imtisâlen taraf-ı şer‘den irsâl olunan Mehmed Efendi dâ‘îleri mezbûre Zeyneb’in Karakî mahallesinde sâkine olduğu menzile varıp mahalle-i mezbûre imâmı es-Seyyid Mustafa Efendi ve ahâlîsinden on iki nefer mazbûtü’l-esâmî Müslimînden tefahhus eylediğinde fi’l-hakīka mezbûre Zeyneb mukaddemâ sevdâsı olup hâlâ bi-emrillâhi te‘âlâ mecnûne olmağla kendiyi muhâfaza eder kat‘a kimesnesi olmayıp ve sâkine olduğu menzil dahi sâbıkā zevci Mustafa’nın mülkü olmağın mecnûne-i mezbûrenin şerr ü mazarrâtından bir vechile emniyet ve rahatımız yokdur deyü her biri teşekkî ve mecnûne-i mezbûreye ilâc ve tımar için Dârü’ş-şifâ’ya vaz‘ olunması bâbında fermân-ı âlî iltimâs ettiklerini mahâllinde tahrîr ve ba‘dehû ma‘an ba‘s olunan ümenâ-i şer‘le meclis-i şer‘a gelip inhâ ve takrîr eylediği huzûr-ı âlîlerine i‘lâm olundu. Fî 29 Zilka‘de sene [1]143.