Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 290 Hüküm no: 309 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azerya v. Yasef’in Evliyahanı’nda bulunan odasından çerçi malını Agop’un çaldığı Ma‘rûz. Kapıkethudâsı Salih Beşe mübâşeretiyle meclis-i şer‘a ihzâr olunan Agop v. Hokaz zimmînin hasmı Azerya v. Yasef nâm Yahûdî merkūm Agop târih-i i‘lâmdan altı gün mukaddem Evliyâhanı’nda vâki‘ odamı açıp işbu mu‘âyene ve müşâhade olunan üç kutnî ve derûnunda olan çerçi metâ‘ını hufyeten ihfâ eyledi deyü da‘vâ eyledikde merkūm Agop ismi ma‘lûmum olmayan bir Yahûdî’den semen-i ma‘lûma iştirâ eyledim deyü inkâr edip mezbûr Azerya Yahûdî getirdiği Ali b. Mustafa nâm şâhidi mezbûr Agop zimmî müdde‘î-yi mezbûrun odasına girip işbu kutnîler ile çıkarken gördüm ve suâl eylediğimde oda sahibi hastadır beni kutnîlerini almağa irsâl eyledi deyü şehâdet edip odaya duhûlünde şâhid-i âhar ityânından âciz oldukdan sonra Yahûd tâifesinden Yasef v. Yako ve Mosi v. Averya nâm Yahûdiler işbu mu‘âyene ve müşâhade olunan üç kutnî içinde olan çerçi metâ‘ıyla müdde‘î-yi mezbûr Azerya Yahûdî’nin mülküdür deyü şehâdet-i şer‘iye edip ve merkūm Azerya Yahûdî’ye vech-i şer‘î üzere yemîn dahi vermekle kutnîleri eşyayla merkūm Azerya Yahûdî’ye teslîme tenbîh olunup ve Ali b. Mustafa’nın şehâdeti üzere vesâirin haberi üzere merkūm Agop zimmî müttehem olduğu huzûr-ı âlîlerine i‘lâm olundu. Fî 2 Zilhicce sene [1]143.