Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 292 Hüküm no: 315 Orijinal metin no: [73a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eve haksız yere el konulduğunun tespiti Ma‘rûz. Arzuhâl eden Roseni Nasrâniye meclis-i şer‘de zikri câ’î menzile vaz‘-ı yedi şer‘an sâbit olan Rali v. İlya nâm zimmî muvâcehesinde ile’l-helâk babam olup Boyacıoğlu demekle meşhûr Na‘lçacı Oskalı v. Dimo’nun yedinde mülkü olup ba‘de helâkihî ırsen bana ve hâzıratü bi’l-meclis anam Kali Nasrâniyeye mevrûs İstanbul’da Avcıbey mahallesinde vâki‘ tarafları Fıçıcı Toma ve Keresteci Hürmüz ve tarîk-ı âm ile mahdûd menzilimi mezbûr Rali bi-gayr-ı hakkın zabteder bana teslîme tenbîh olunmak murâdımdır deyü da‘vâ ol dahi cevâbında anası merkūme Kali Nasrâniye müstakilleten kendi mülkü olmak üzere on sene mukaddem yüz altmış guruş semen-i medfû‘ ve makbûza bana bey‘ ve teslîm eyledi mezbûrenin babasından mevrûs mülkü olduğu ma‘lûmum değildir deyü inkâr eyledikde müdde‘iye-i mezbûre Roseni Nasrâniye ikāmet eylediği udûl-i Müslimînden Abdi Subaşı mahallesi ahâlîsinden Mehmed b. Abdullah nâm kimesne ile nasârâ beyninde udûlden Samatya’da sâkin Şideri v. Bobo ve Atpazarı’nda kâîn Na‘lçacı İstefan v. İsak nâm zimmîler fi’l-hakīka menzil-i mahdûd-ı mezkûr Boyacıoğlu demekle ma‘rûf Na‘lçacı Oskalı v. Dimo’nun hayatında mülkü olup ba‘de helâkihî kızı işbu müdde‘iye-i mezbûre Roseni Nasrâniye ile zevcesi Kali Nasrâniyenin mevrûs mülk ve haklarıdır deyü edâ-i şehâdet-i şer‘iye edip şehâdetleri hayyiz-i kabûlde vâki‘a oldukdan sonra mezbûre Roseni Nasrâniye ba‘de’t-tahlîfi’l-mu‘teber mûcebiyle menzil-i mahdûd-ı mezbûrdan mezbûre Roseni Nasrâniyenin hissesini teslîme merkūm Rali zimmîye tenbîh olunduğu huzûr-ı âlîlerine i‘lâm olundu. Fî 4 min-Zilhicce sene [1]143.