Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 293 Hüküm no: 316 Orijinal metin no: [73a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asîle Hatun vakfından olan menzilin hisselerinin satılması Ma‘rûz. Keşşâf. Taht-ı nezâretimizde olan evkāfdan mahmiye-i İstanbul’da Mollahüsrev mahallesinde Asîle Hatun vakfından nısfı sahib-i arzuhâl es-Seyyid Ahmed ve nısf-ı âharı derûn-ı arzuhâlde isimleri mastûr Fâtıma ile zevci Mehmed’in bi’l-icâreteyn tasarruflarında olan menzilin mezbûr es-Seyyid Ahmed nısf hissesini müşterikleri olan mezbûrânın rızâlarıyla ifrâz murâd etmeğin taraf-ı şer‘den keşf nâibimiz Mevlânâ Mustafa Efendi dâ‘îleri Hâssa mi‘mârlarından Yusuf Halîfe ile menzil-i mezbûrun üzerine varıp meşrûtiyyet üzere mütevellîsi olan es-Seyyid Abdullah Efendi hazır olduğu hâlde ba‘de’l-mu‘âyene menzil-i mezbûr kābil-i taksîm olmadığından mâ‘adâ vakfa muzır olup mütevellî-yi mezbûrun dahi rızâsı olmamağla mezbûrân Fâtıma ile zevci Mehmed ber-vech-i iştirâki’s-seviy mutasarrıf oldukları nısf hisse-i şâyi‘alarını hüsn-i rızâlarıyla müşterikleri mezbûr es-Seyyid Ahmed’e yüz altmış beş guruş bedel mukābelesinde ferâğ ve tefvîz ve istifâsına müte‘allika âmme-i da‘vâdan her biri âharın zimmetini ibrâ eylediklerin mevlânâ-yı mezbûr mahâllinde ba‘de’t-tahrîr inhâ eylediği huzûr-ı âlîlerine i‘lâm olundu. Fî 2 Zilhicce sene [1]143.