Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 296 Hüküm no: 424 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gemide ölü bulunan Mehmed b. Hasan’ın vârislerine diyet parası ödendiği Husûs-ı âti’r-rakīk mahallinde ketb olunması’çün cânib-i şer‘-i şerîfden bi’t-taleb irsâl olunan mevlânâ Abdulkādir Efendi mahmiye-i İstanbul’da Saray-ı cedîd-i sultânîde Hasbağçe’ye varıp bi’l-fi‘il bostancıbaşı olan iftihârü’l-emâcid ve’l-ekârim Hasan Ağa zeyl-i kitâbda mastûrü’l-esâmî olan Müslimîn huzûrlarında akd-i meclis-i şer‘-i şerîf eyledikde hâssa bostancılarından olup târîh-i kitâbdan üç gün mukaddem mecrûhan fevt olan Mehmed b. Hasan’ın bi’l-inhisâr vârisleri olan vâlidesi Âişe bt. Abdullah ve li-ebeveyn kız karındaşları Sâliha ve Fâtıma nâm hatunlar meclis-i mezbûrda işbu bâ‘iseyi’l-kitâb Osman b. Süleyman ve sefîne reislerinden Paftic v. Todori nâm zimmî muvâcehelerinde herbiri bi’t-tav‘i’s-sâf ikrâr u i‘tirâf edip mûrisimiz merkūm Mehmed mezkûr Paftic Reis’in hâlâ keresteciler iskelesinde merbûta olan sefînesi içinde üç gün mukaddem mecrûhan maktûl bulunmağla mezbûr Mehmed’i [Osman] ve merkūm Paftic Reis’i mazınne ittihâz edip müteveffâ-i mezbûrun dem ü diyetini mezbûrândan da‘vâ üzere iken aramıza muslihûn tavassut edip “es-sulhü seyyidü’l-ahkâm” fehvâsınca yirmi bin nakd râyic fi’l-vakt fıddî akçe üzerine an-inkâr beynimizde inşâ-i akd-i sulh eylediklerinde biz dahi sulh-i mezbûru kabûl ve bedel-i sulh olan meblağ-ı merkūm yirmi bin akçeyi merkūmân Mehmed [Osman] ve Paftic Reis yedlerinden bi’t-tamam ve’l-kemâl ahz u kabz edip mûrisimiz müteveffâ-i mezbûrun dem ü diyetine müte‘allik da‘vâdan mezbûrânın zimmetlerini ibrâ-i âmm-ı kātı‘u’n-nizâ‘ ile herbirimiz ibrâ ve ıskāt eyledik, husûs-ı mezbûra müte‘allik vechen mine’l-vücûh mezbûrân ile da‘vâ ve nizâ‘ımız kalmadı ba‘de’l-yevm mazmûn-ı kitâba muhâlif biribirimizden bi’z-zât ya bi’l-vekâle mezbûrân üzerine da‘vâ sudûr ederse lede’l-hükkâmi’l-kirâm mesmû‘a ve makbûle olmaya dediklerinde mezbûrân Âişe ve Fâtıma [ve] Sâliha’nın ikrâr u i‘tirâfları merkūmân Mehmed [Osman] ve Paftic Reis vicâhen tasdîk etmeğin.