Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 295 Hüküm no: 423 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’nin Ali Beşe’de alacağı olduğuna dair iddiasını ispatlayamadığı Mahmiye-i İstanbul’da Kumkapısı kurbünde keresteci olan Ahmed Beşe [b.] Ali nâm kimesne meclis-i şer‘de bâ‘isü’l-kitâb Ali Beşe b. Mehmed mahzarında üzerine da‘vâ ve takrîr-i kelâm edip mezbûr Ali Beşe zimmetinde cihet-i karzdan altı bin akçe hakkım olup taleb eylediğimde edâya iktidârı olmamağla meblağ-ı mezbûru vech-i muharrer üzere deyni olduğuna yedime temessük vermiş idi. Hâlâ yedinde olan deyn temessükü mûcebince meblağ-ı mezbûr altı bin akçe hakkımı mezbûr Ali Beşe’den taleb ederim, suâl olunsun dedikde gıbbe’s-suâl mezbûr Ali Beşe cevâbında târîh-i kitâbdan iki sene mukaddem tamamı beynimizde tavsîf olmak üzere merkūm yedinden bi-tarîkı’l-mudârebe kırk bin akçe kabz edip meblağ-ı mezbûr ile Karadeniz’e sefer edip nemâsından yedi bin akçe hâsıl olup mezbûr Ahmed Beşe’nin hissesine isâbet eden on bin beş yüz akçeyi kendüye def‘ ve teslîm edip bir kaç sefer dahi edip bir şey nemâsından hâsıl olmamağla asl-ı mâl olan kırk [bin] akçeyi benden aldıkdan sonra bana on ki bin fâide hâsıl olmuş nısf benim hisseme isâbet etmişdir deyü beni tazyîk <> etmekle yedine temessük vermiş idim, karzdan altı bin akçe deyni olduğunu inkâr edicek mezbûr Ahmed Beşe merkūm Ali Beşe’yi temessük husûsu için tasdîk eyledikde mezbûr Ali Beşe bu husûsda yemînle musaddak olmağla mezbûr Ali Beşe’ye müdde‘î-i merkūm Ahmed Beşe’ye asl-ı mâl olan kırk bin akçe nemâsından zimmetinde altı bin akçe hakkı olmadığına yemîn teklîf olundukda alâ-vechi’l-mesûl yemîn bi’llâhi’l-aliyyi’l-azîm etmeğin mûcebince mezbûr Ahmed Beşe’ye mezbûr Ali Beşe’ye bî-vech ta‘arruzdan men‘ olunup mâ-vaka‘a bi’t-taleb ketb olundu. Hurrire fi’l-hâmis min-Ramazani’l-mübârek sene 1064. Şuhûdü’l-hâl: İbrahim Çelebi b. Davud, Hasan b. Abdullah, Pîrî Beşe b. Hüseyin, Rıdvan b. [Abd]ullah, Muharrem b. Abdullah, Halil b. Mustafa, Ramazan b. Yusuf.