Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 294 Hüküm no: 319 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce Hatun’un annesinden kalan vakıf ev hissesine el konulduğu yolundaki iddiasının asılsız olduğu Ma‘rûz. Dîvân-ı hümâyûn çavuşlarından Ali Çavuş mübâşeretiyle Çarşamba günü huzûr-ı âlîlerinde ma‘kūd meclis-i şer‘de ihzâr olunan Hasan Çelebi b. Halil’in hasmı Hadîce Hatun mahmiye-i İstanbul’da İbrahim Çavuş mahallesinde vâki‘ gallesi mescid-i mezbûr müezzini olanlara meşrûta vakıf ma‘lûmü’l-hudûd menzil vâlidem Hanife Hatun’un bi’l-icâreteyn tasarrufunda iken fevt oldukda menzil-i mezbûrun rub‘u bana intikāl-i âdî ile intikāl etmiş iken mezbûr Hasan Çelebi bi-gayr-ı hakkın zabtedip hissemi tasarrufdan beni men‘ eder deyü da‘vâ ve ol dahi cevâbında müdde‘iye-i mezbûrenin vâlidesi merkūme Hanife menzil-i mezbûr tasarrufunda olduğu hâlde vefâtından on iki sene mukaddem bin yüz otuz dört senesi Cumâdelûlâsı gurresinden ma‘rifet-i mütevellî ile zevci Hüseyin Çavuş’a ferâğ ve kasr-ı yed etmekle ol dahi ba‘de’t-tefevvüz bin yüz yirmi dört senesi Rebî‘ülevveli’nde ma‘rifet-i mütevellî ile Halil nâm kimesneye ferâğ mezbûr Halil dahi bin yüz yirmi sekiz senesi Saferü’l-hayrı’nın yirmi beşinci günü babam diğer Halil b. Abdullah’a ferâğ ve kasr-ı yed edip babam dahi bir sene mukaddem vefât etmekle intikāl-i âdî ile bana intikāl edip hatta müdde‘iye-i mezbûre ile kırk iki senesi Cemâziyelevveli’nin on dördüncü günü İstanbul kādısı Mehmed Râşid Efendi’nin Bâb Nâibi Ahmed Efendi huzûrunda mürâfa‘a olduğumda yedimde olan hüccet mantûkunca def‘imi isbât eyledim deyü def‘ine mutâbık ve takrîr-i meşrûhu üzere hüccet ibrâz ve mazmûnunu zeylinde olan şühûddan Câbî İsmail Çelebi b. Yusuf ve İmâm Hasan Efendi b. Mehmed ve Ahmed Çelebi b. Hüseyin şehâdetleriyle isbât edip mezbûrûn ba‘de’t-ta‘dîl ve’t-tezkiye şehâdetleri makbûle olmağın mezbûre Hadîce mu‘ârazadan men‘ olunduğu huzûr-ı âlîlerine i‘lâm olundu. Fî 5 Zilhicce sene [1]143.