Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 299 Hüküm no: 331 Orijinal metin no: [74b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurban bayramı sonrası koyun eti için uygulanacak narh Ma‘rûz. Her sene Îd-i edhâ akībinde lahm-ı ganemin narhı tenzîl olunmak de’b-i kadîm olduğuna binâen saray-ı âlîlerinde arz odasında izzetlü sa‘âdetlü Kethudâbey ve izzetlü sa‘âdetlü Yeniçeriağası hazerâtı kulları huzûrunda akd-i meclis-i şer‘ olunup Ser-kassâbân-ı Hâssa el-Hâc Osman Ağa ve Kasablar Kethudâsı Hattât Mehmed Ağa kulları ve tâife-i merkūmenin [yiğ]idbaşıları ve selhhâne ashâbından el-Hâc Ali ve el-Hâc Osman ve el-Hâc Ahmed ve el-Hâc İbrahim ve el-Hâc Abdurrahman ve Ebûbekir ve Mehmed Ağa ve Mehmed Beşe ve Mehmed ve Osman ve Hasan Çelebi ve Tophâneli el-Hâc Halil ve el-Hâc Mustafa ve es-Seyyid İsmail ve Galatasarayı’ndan Mehmed Efendi ve Ciğerciler Kethudâsı Ali Bey ve Eğrikapı’dan Ali Beşe ve es-Seyyid Mehmed ve el-Hâc Abdullah ve Eyüb’den el-Hâc Hüseyin da‘vet-i şer‘ ve târih-i i‘lâm şehrinin on beşinci gününden sonra kadîmî üzere lahm-ı ganemin kıyyesi dörder paraya ve lahm-ı kuzunun vakıyyesi on dörder akçeye bey‘ olunmak üzere her birine tenbîh olundukda tâife-i merkūme bu sene-i mübârekede şiddet-i şitâdan nâşî koyun ziyâde helâk olmağın Îd-i edhâ’da edhiye için gelen koyun kalîl olmağla etrâfdan celb-i ağnam ve tevsî‘-i erzâka vesîle olmak için Muharremi’l-harâm’ın on beşinci gününe değin [75a] lahm-ı ganemin kıyyesine on dört akçe ve lahm-ı kuzunun kıyyesine on altı akçeye bey‘a ruhsat verilir ise karîb olan mahallerden ganem gelir ve dükkânlarımızda ahşama değin a‘lâ lahm-ı ganem bulunur ve eğer ahşama değin lahm-ı ganem bulunmaz ise bizim ve ta‘yîn olunan narhdan ziyâdeye bey‘ olunur ise yâhud noksan vezn ederler ise kanâdârlarımızın lâzım gelen cezâlarımız tertîb olunsun deyü her biri iltimâs ve Muharremi’l-harâm’ın on beşinci gününden sonra lahm-ı ganemin kıyyesi on iki akçeye bey‘a ta‘ahhüd eyledikleri cümle muvâcehesinde tescîl olunup huzûr-ı âlîlerine i‘lâm olundu. Müsâ‘ade buyurulursa ol bâbda re’y ve fermân hazret-i veliyyü’l-emrindir. Fî 14 min-Zilhicce sene [1]143.