Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 297 Hüküm no: 426 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cerbe ahalisinden olup İstanbul’da vefât eden el-Hâc Said’in mallarını vârislerine ulaştırmak üzere Ömer b. el-Hâc Süleyman’ın vekil tayin edildiği Diyâr-ı Mağrib’de Cezîre-i Cerbe ahâlîsinden işbu bâ‘isü’l-kitâb Ömer b. el-Hâc Süleyman nâm kimesneden hasm-ı münkir mahzarında vech-i âtî üzere da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra yine Cerbe ahâlîsinden Şerif Muhammed b. Şerif Muhammed ve el-Hâc Şerif Muhammed b. Şerif es-Sekî mahfil-i kazâda li-ecli’ş-şehâde hâzırân olup cezîre-i mezbûreden olup bundan akdem vefât eden merhûm el-Hâc Said b. el-Hâc Abdurrahman’ın bi’l-inhisâr vârisleri olan zevcesi Süleyman bt. Yusuf ve vâlidesi Selime bt. Ya‘kub ve li-ebeveyn karındaşları Mesude ve Hadice ve Lü’lü’ nâm hatunlar taraflarından vekâlet-i âmme-i mutlaka ile vekîl ve âharı tevkîle me’zûn olan el-Hâc Mehmed b. Amr nâm kimesne müteveffâ-i mezbûrun mahmiye-i İstanbul’da zimem-i nâsda olan hukūkunu da‘vâ ve talebe ve ahz u kabz ve verese-i mezbûreye îsâle ve lede’l-hükkâmi’l-kirâm kabz ve îsâle mütevakkıf olan umûra müsteşhed-i mezbûr Ömer b. el-Hâc Süleyman’ı kezâlik vekâlet-i âmme-i mutlaka ile bizim huzûrumuzda tarafından vekîl ve nâib-i menâb nasb ve ta‘yîn edip ol dahi vekâlet-i mezbûreyi kabûl ve merâsimini edâya müte‘ahhid oldu, biz bu husûsa şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyet-i şerâyiti’l-kabûl şehâdetleri makbûle olmağın mûcebince mezbûr Ömer’in vekâletine hüküm-birle mâ-vaka‘a gıbbe’t-taleb ketb ü sebt olundu. Tahrîren fî-13 [Ramazan] sene 1064. Şuhûdü’l-hâl: el-Hâc Selim b. Cum‘a, el-Hâc Ramazan b. Mehmed, Mehmed Çelebi b. Said, el-Hâc Ebûbekir b. Ebîzeyd, el-Hâc Selim ve gayruhum mine’l-huzzâr.