Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 306 Hüküm no: 346 Orijinal metin no: [76a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Silistre ve Babadağı Kıbtiyânı cizyedarı Uzun Mehmed Ağa ile Mehmed arasında alacak davasının sübût bulmadığı Ma‘rûz. Sahib-i arzuhâl Mehmed derûn-ı arzuhâlde mezkûrü’l-ism Uzun diğer Mehmed Ağa mahzarında bir sene mukaddem vilâyet-i Rumeli’nde vâki‘ Silistre ve Babadağı Kıbtiyânı cizyedârı olup mezbûr Uzun Mehmed Ağa Pazarcık ve Yalıkulu Kıbtiyânı cizyedârı olmağla cizye evrâkı bahâsından Bozukcu Ali ve zevcesi Havva zimmetlerinde olan kırk sekiz guruş ve Kara Ali ve Durmuş nâm kimesnelerde kezâlik evrâk bahâsından on dört guruşu mezbûr Uzun Mehmed Ağa’ya havâle etmemle ol dahi ancak mezbûrân Bozukcu Ali ve zevcesi Havva’da olan kırk sekiz guruşu ahz etmekle taleb ederim deyü da‘vâ eyledikde ol dahi inkâr etmeğin müdde‘î-yi mezbûr müdde‘âsını isbâtdan âciz olmağla bi’t-taleb mezbûr diğer Mehmed Ağa ba‘de’t-tahlîfi’ş-şer‘î mûcebince müdde‘î-yi mezbûr bilâ-beyyine bî-vech mu‘ârazadan men‘ olunmuşdur. Fi 21 Zilhicce sene [1]143.