Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 312 Hüküm no: 364 Orijinal metin no: [77b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karısı Râbia’nın ölümüne sebep olan Seyyid Süleyman’ın, vârislerden Mehmed’e diyet hissesini ödemesi gerektiği Ma‘rûz. Sahib-i arzuhâl Mehmed hasmı es-Seyyid Süleyman ile terâfu‘larında yedi sene mukaddem li-ebeveyn kız karındaşım Râbia Hatun zevce-i menkûhası olduğu hâlde mezbûr es-Seyyid Süleyman zevcesi mezbûrenin hatâen odun parçası ile başına darb ve katledip verâseti sagīre kızı Hafize’ye ve li-ebeveyn er karındaşı olmamla bana ve li-ebeveyn kız karındaşı olan gāib ani’l-beled Fâtıma’ya münhasıra olmağın müteveffât-ı mezbûrenin sîmden şer‘an lâzım gelen diyetiʼçün beş bin dirhem-i şer‘îden ancak benim hisseme lâzım gelen bin altı yüz altmış altı dir[h]em ve sülüsân dirhemin her biri on beşer buçuk akçeye râyic idiği lede’ş-şer‘i’l-enver müte‘ayyin olan cem‘an yirmi beş bin sekiz yüz otuz sekiz akçeyi mezbûr es-Seyyid Süleyman’dan taleb ederim deyü ba‘de’d-da‘vâ ve’l-inkâr müdde‘î-yi mezbûr müdde‘âsını ba‘de’t-tezkiye adâletleri zâhir olan şühûd-ı udûlle isbât etmeğin mûcebiyle hükm ve tenbîh olunduğu huzûr-ı âlîlerine i‘lâm olundu. Fî 28 Zilhicce sene [1]143.