Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 301 Hüküm no: 430 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi’nin boşandığı karısının yanında bulunan çocuğunun birikmiş nafakasını ödemesi Galata kazâsı muzâfâtından kasaba-i Fındıklı’da Mahmud Efendi Mahallesi’nde sâkine işbu bâ‘isü’l-kitâb Reyhan bt. İlyas nâm hatun mahfil-i kazâda zevc-i <> mutallakı İbrahim Efendi mahzarında üzerine da‘vâ ve takrîr-i kelâm [edip] İbrahim Efendi’nin elli sekiz senesinde beni tatlîk eyledikde hâlâ hacr ve terbiyemde olan benden mütevellid sulbî oğlu Halil nâm sagīr için ol târîhde kazâ-i mezbûrda hilâfeten müvellâ olan Ahmed Efendi’ye yevmî dörder akçe nafaka farz ve takdîr ettirip hîn-i zarûretde istidâne ve lede’z-zafer mezbûr İbrahim Efendi’ye rücû‘a bana izin verip hüccet-i şer‘iyye olunmuş idi. Ben dahi ol hüccet mûcebince târîh-i mezbûrdan bu âna gelince istidâne edip sagīr-i merkūmun nafaka ve kisvesine sarf ettiğim sekiz bin altı yüz kırk akçeyi mezbûr İbrahim Efendi’den taleb ederim, suâl olunsun deyip mazmûnu takrîrine muvâfık mûmâ-ileyh Ahmed Efendi’nin imzâ ve hatemini müştemil hüccet-i şer‘iyye ibrâz etmeğin gıbbe’l-istintak mezbûr İbrahim Efendi mazmûn-ı hücceti ikrâr edip sagīr-i mezbûr için takrîr ve sarf olunan yevmî dörder nafaka-i mefrûza-i müstedâneden müctemi‘ olan meblağ-ı mezbûr sekiz bin altı yüz kırk akçe el-ân senini’çün zimmetimde edası lâzım deynimdir deyü i‘tirâf etmeğin mûcebince edâsı’çün mezbûr İbrahim Efendi’ye tenbîh olundu, mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’s-sâbi‘ ve’l-ışrîn min-şehri Ramazani’l-mübârek sene 1064. Şuhûdü’l-hâl: Ahmed Çavuş el-mübâşir, Mehmed Beşe b. İbrahim, es-Seyyid Mehmed Çelebi b. Şükrullah, Hasan Beşe b. Ali, Osman Beşe b. Hasan ve gayruhum mine’l-huzzâr.