Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 322 Hüküm no: 391 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer’in kendini tehdit edip parasını alan Veli hakkındaki şikayetini ispatlayamadığı Ma‘rûz. Sahib-i arzuhâl es-Seyyid Ömer derûn-ı arzuhâlde mezkûrü’l-ism olan hasmı Veli nâm kimesne mahzarında mezbûr Veli bin yüz kırk üç senesi Cumâdelûlâ gurresinde ve vakt-i ihtilâlde gāib ani’l-meclis kayınatan Uzun Süleyman nâm kimesnenin sen vekîlisin deyü on mikdârı harbeli ile seni musallaya götürürüm deyü beni tahvîf edip cebren ve bi-gayr-ı hakkın yüz guruşumu ahz etmişdir deyü da‘vâ eyledikde mezbûr Veli cevâbında mezbûr es-Seyyid Ömer’in kayınatası mezbûr Uzun Süleyman karındaşı gāib ani’l-beled İbrahim nâm kimesnenin zevcesi Şemsi nâm hatunu sekiz sene mukaddem vilâyet-i Anadolu’da Develü kazâsına tâbi‘ Develü Zilesi nâm karyede bi-gayr-ı hakkın katletmekle karındaşı gāib-i mezbûr işbu yedimde olan hüccet mantûkunca mezbûr es-Seyyid Ömer’in kayınatası merkūm Uzun Süleyman’dan müteveffât-ı mezbûrenin dem ü diyetini ba‘de’d-da‘vâ vesâtet-i muslihûn ile karındaşım gāib-i mezbûr yüz guruş ahz etmişdir deyip ber-vech-i muharrer müdde‘î-yi mezbûr es-Seyyid Ömer’den kendi kabzını bi’l-külliye inkâr etmekle müdde‘î-yi mezbûr es-Seyyid Ömer târih-i mezbûrda ber-vech-i muharrer kendiyi tahvîf edip yedinden yüz guruşunu cebren ve bi-gayr-ı hakkın kabzını lede’t-tezkiye adâletleri zâhir olan müseccelü’l-esâmî dört nefer Müslimîn şehâdetleriyle mezbûr Veli muvâcehesinde isbât etmeğin mûcebince hükm ve tenbîh olunduğu huzûr-ı âlîlerine i‘lâm olundu. Fî 11 Muharrem sene [1]144.