Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 324 Hüküm no: 396 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Efendi’nin Ayntab Kayacık zeametinden Muhzırbaşı Mehmed Ağa’da alacağı olduğu Ma‘rûz. Zu‘amâdan gāib ani’l-meclis Karakelle demekle ma‘rûf Mehmed Ağa b. Hasan tarafından sâbitü’l-vekâle kayınpederi sahib-i arzuhâl Süleyman Efendi meclis-i şer‘de derûn-ı arzuhâlde mezkûrü’l-ism Muhzırbaşı Mehmed Ağa’dan müvekkil-i mezbûrun Ayntab’da vâki‘ Kayacık ze‘âmeti karyelerinin a‘şâr-ı şer‘iye ve rüsûm-ı örfiyesini cem‘ ve tahsîl için bin yüz kırk iki senesinde vâki‘ Mart ibtidâsından sene tamamına değin dört yüz guruşa ilzâm ol dahi iltizâm edip iki yüz guruşunu müvekkil-i mezbûra edâ ve teslîm ile yedine ilzâm temessükü verdikden sonra sene-i merkūmede ze‘âmet-i merkūmeyi ta‘şîr etmekle bâkī iki yüz guruşu bi’l-vekâle taleb ve da‘vâ eyledikde mezbûr Muhzırbaşı Mehmed Ağa cevâbında minvâl-i meşrûh üzere olduğunu ikrâr lâkin zikrolunan kurâlar a‘şârından sene-i mezbûrede ancak ba‘de’l-mesârifi’l-ma‘lûme üç yüz kırk guruş hâsıl olmağla iki yüz guruşunu müvekkil-i mezbûre ba‘de’l-edâ ve yirmi guruşunu dahi bi-tarîkı’l-havâle hazır bi’l-meclis Halil Efendi’ye def‘ ve teslîm ancak yüz yirmi guruşu zimmetimde bâkī kalmışdır deyü ikrâr ve i‘tirâf etmeğin mûcebince meblağ-ı bâkī-i mezbûr yüz yirmi guruşu vekîl-i mezbûr Süleyman Efendi’ye edâ ve teslîme mezbûr Muhzırbaşı Mehmed Ağa’ya tenbîh olunduğu huzûr-ı âlîlerine i‘lâm olundu. Fî 15 Muharrem sene [1]144.