Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 302 Hüküm no: 433 Orijinal metin no: [63b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş v. Yorgi’nin borcuna kefil olan Yorgi’nin ödediği meblağın kendisine iadesi Allâhümme kema en‘amte aleynâ hatemehû ahtimnâ bi’l-İslâm ve edhilnâ dâre’s-selâm harrahû el-fakīr ileyhi sübhânehû er-râcî afvehû ve gufrânehû Süleyman el-müderris bi-medîneti Haydar Paşa enâlehü’llâlü te‘âlâ ilâ-mâ-yürîd ve mâ-yeşâ’ (Mühür) İşbu bâ‘isü’r-rakīm Yorgi v. Dimo nâm zimmî mahfil-i kazâda Anaştaş v. Yorgi nâm zimmî muvâcehesinde üzerine da‘vâ ve takrîr-i kelâm edip mezbûr Anaştaş’ın gāibân ani’l-meclis Yani ve Avpor nâm zimmîlere bin iki yüz akçe deyni olmağla mezbûrun emriyle meblağ-ı merkūma ben kefîl bi’l-mâl olmuş idim, kefâletim hasebiyle gāibân-ı merkūmân meblağ-ı mezbûru benden ahz u kabz eylediler, ben dahi mezbûra mürâca‘at edip zikrolunan bin iki yüz akçeyi taleb edersin suâl olunsun dedikde gıbbe’s-suâl ve’l-inkâr müdde‘î-i merkūmdan da‘vâsına mutâbıka beyyine taleb olundukda Yani v. Dimo ve Şiro v. Yani ve Dimo v. Kosta nâm zimmîler li-ecli’ş-şehâde meclis-i şer‘e hâzirûn olup istişhâd olunduklarında fi’l-hakīka mezbûr Anaştaş gāibân-ı merkūmâna olan bin iki yüz akçe deynime kefîl ol deyü müdde‘î-i merkūma bizim huzûrumuzda emredip ol dahi mezbûrun emri ile kefîl bi’l-mâl oldukdan sonra merkūmân Yani ve Avpor meblağ-ı mezbûru kefâleti hasebiyle müdde‘î-i mezbûrdan yine bizim huzûrumuzda bi’t-tamam kabz eylediler, biz bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle meblağ-ı mezbûr bin iki yüz akçeyi kefîl-i merkūm Yorgi’ye def‘ ve teslîm etmek üzere merkūm Anaştaş’a tenbîh olunup mâ-vaka‘a bi’t-taleb ketb olundu. Fi’l-yevmi’l-hâmis min-Şevvâli’l-mükerrem li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Pîrî Beşe b. Hüseyin, Mehmed b. Hüseyin, Rıdvan Beşe b. Abdullah ve gayruhum.