Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 360 Hüküm no: 438 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in kürkünü haksız yere aldığı iddiasıyla Süleyman b. Süleyman tarafından açılan davanın sulhla sonuçlandığı Sulh. Mahmiye-i İstanbul hısnı ebvâbından Ahırkapı kurbünde vâki‘ Şadırvan ahırında sâkin el-Hâc Süleyman b. Süleyman nâm kimesne meclis-i şer‘-i şerîf-i enverde bâ‘isü’l-kitâb el-Hâc Ali b. Mehmed nâm kimesne mahzarında ikrâr ve takrîr-i kelâm edip bundan akdem mezbûr el-Hâc Ali eşyâ-i memlûkemden elli guruş kıymetli bir aded kırmızı çukaya kaplı nâfe kürkümü yedimden bi-gayr-ı hakkın ahz u kabz ve istihlâk etmekle mevcûde ise aynın müstehleke ise ba‘de’s-sübût kıymet-i şer‘iyesin mezbûr el-Hâc Ali’den bi-tarîkı’d-damân taleb ve da‘vâ eylediğimde ol dahi inkâr etmeğin beynimizde münâza‘ât-ı kesîre cereyân etmişidi. El-hâletü-hâzihi beynimize muslihûn tavassut edip da‘vâ-yı mezkûremden beni mezbûr el-Hâc Ali ile an-inkâr on guruş üzerine sulh eylediklerinde ben dahi sulh-ı mezbûru ba‘de’l-kabûl bedel-i sulh olan meblağ-ı mezbûr on guruşu yedinden tamamen ahz u kabz eylediğimden sonra husûs-ı mezkûra ve târih-i kitâba gelince sâir beynimizde cereyân eden ahz u i‘tâya müte‘allika âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 19 Muharrem sene [1]144. Şuhûdü’l-hâl: el-Hâc Said b. el-Hâc Mehmed, el-Hâc Ali b. Mansur, el-Hâc Abdullah b. Abdul‘âlî, Mehmed b. Ahmed, es-Seyyid el-Hâc Abdullah b. es-Seyyid el-Hâc Ali, el-Hâc Mehmed-i Batrân.