Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 360 Hüküm no: 439 Orijinal metin no: [90a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Siyah cariye Fatıma’nın azat edildiğini ispat edemeyip Edirneli Seyyid Mustafa Ağa’da kaldığı Bilâ-beyyine mu‘ârazadan men‘. Rıkk-ı sâbıkını mu‘terife olmağla zikri âtî da‘vâya kıbel-i şer‘den me’zûn olan orta boylu açık kaşlı kara gözlü Afnovi’l-asl? Fâtıma b. Abdullah nâm siyah câriye meclis-i şer‘-i şerîf-i enverde mahrûse-i Edirne ahâlîsinden olup hâlâ mahmiye-i İstanbul’da Demirkapı kurbünde Mısrî Mustafa Ağa menzilinde müsâfiren sâkin işbu bâ‘isü’l-kitâb Mustafa Ağa b. İvaz mahzarında üzerine da‘vâ ve takrîr-i kelâm edip mâlik-i evvelim olup mahrûse-i mezbûrede sâkine Râbia bt. Mustafa nâm hatunun câriye-i memlûkesi olduğum hâlde târih-i kitâbdan beş sene mukaddem mülkünden ı‘tâk ve tahrîr etmekle ben hürre olmuş iken mezbûr es-Seyyid Mustafa Ağa câriye-i memlûkesi olmam üzere vaz‘-ı yed eder suâl olunup sebîlim tahliye olunmak matlûbumdur dedikde gıbbe’s-suâl mezbûr Mustafa Ağa cevâbında câriye-i mezbûreyi târih-i kitâbdan on beş gün mukaddem İsmail Ağa nâm kimesneden yedinde mülk ve hakkı olduğu hâlde yüz yirmi guruş semen-i medfû‘ ve makbûza iştirâ ve kabz ve tesellüm eyledim deyü mülk-i müşterâsı olmak üzere vaz‘-ı yedini ikrâr ve vech-i meşrûh üzere mezbûre Râbia’nın mülkü olduğu hâlde mülkünden ı‘tâkı ma‘lûmum değildir deyü inkâr edicek câriye-i mezbûreden ber-vech-i muharrer ıtkını mübeyyine beyyine taleb olundukda ityân-ı beyyineden ba‘de’l-izhâri’l-acz ve’l-istihlâf mezbûr Seyyid Mustafa Ağa’ya vech-i şer‘î üzere yemîn verilmeğin câriye-i mezbûre merkūm Seyyid Mustafa Ağa’nın mülkü olmak üzere terk olunup mâ-hüve’l-vâki‘ bi’t-taleb ketb olundu. Fî 20 Muharrem sene [1]144. Şuhûdü’l-hâl: Mehmed Efendi b. İbrahim Efendi, Ahmed b. Şa‘ban, Mehmed Çelebi b. Abdullah, Yakub b. Abdullah, İbrahim b. Mustafa du‘âcı, Mehmed b. Hasan, Mumcu Ali Beşe el-mübâşir.