Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 363 Hüküm no: 443 Orijinal metin no: [90b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli’nde Atina kasabası’dan Hadîce Hatun’un nafaka davasında sulh olduğu Fi’l-asl vilâyet-i Rumeli’nde Atina kasabası ahâlîsinden olup mahmiye-i İstanbul’da el-Hâc Ferhad mahallesinde müsâfereten sâkine ve zâtı ta‘rîf-i şer‘î ile mu‘arrefe olan Hadîce bt. Mehmed nâm hatun meclis-i şer‘-i şerîf-i enverde zevc-i sâbıkı râfi‘u’l-vesîka Ebûbekir Ağa b. Mehmed nâm kimesne mahzarında ikrâr ve takrîr-i kelâm edip mezbûr Ebûbekir ile zevciyet beynimizde kāime olduğu hâlde mezbûrun firâşından hâsıl ve benden mütevellide sagīre kızlarım Âişe ve Fâtıma bi-hakkı’l-hıdâne hacr ve terbiyemde olmağla bin yüz kırk senesi Saferü’l-hayrı gurresinden târih-i kitâb şehri gurresine gelince beher yevm takdîr-i kādı ile altışar para nafaka-i mefrûza-i müstedânelerinden müctemi‘ olan yüz altmış altı guruş müstedâne nafakaların mezbûr Ebûbekir Ağa’dan taleb ve da‘vâ eylediğimde beynimizde münâza‘ât-ı kesîre vâkı‘a olmuşidi. El-hâletü-hâzihi beynimize muslihûn tavassut edip da‘vâ-yı mezkûremden mezbûr Ebûbekir Ağa ile beni yüz guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz guruşu yedinden tamamen ahz u kabz edip mâ‘adâ nafakaya müte‘allika da‘vâdan mezbûr Ebûbekir Ağa’nın zimmetini ibrâ ve ıskāt eyledik ol dahi bedel-i sulh deyü bana medfû‘u olan yüz guruşa müte‘allika da‘vâdan benim zimmetimi ibrâ ve ıskāt etmekle ba‘de’l-yevm husûs-ı mezbûra müte‘allika mezbûr Ebûbekir Ağa ile da‘vâ ve nizâ‘ ve husûmetim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 Muharrem sene [1]144. Şuhûdü’l-hâl: Atinalı Osman Ağa, Topçubaşı Hasan Ağa, Çukadâr Memiş Ağa, Çukadâr Osman Ağa b. Mehmed, es-Seyyid Hüseyin b. ( ), Muslu Çavuş b. Hüseyin, Salih Çelebi b. Süleyman muhzır.